2016-cı ilin Aprel döyüşləri hərbi baxımdan məhdudmiqyaslı əməliyyat kimi qiymətləndirilsə də, onun hərbi, siyasi, diplomatik və psixoloji nəticələri regionun siyasi-təhlükəsizlik arxitekturasında ciddi dönüş yaratdı. Dörd gün davam edən bu hərbi əməliyyatlar 4 il sonra baş verən və 44 gün davam edən Vətən müharibəsi üçün strateji zəmin rolunu oynadı və Azərbaycan dövlətinin hərbi-siyasi kursunun effektivliyini nümayiş etdirdi.
Bu fikirləri AZƏRTAC-a açıqlamasında Milli Məclisin deputatı Rizvan Nəbiyev deyib.
O xatırladıb ki, Aprel döyüşləri zamanı Azərbaycan Ordusu qısa müddətdə mühüm taktiki uğurlar əldə edərək bir sıra strateji əraziləri nəzarətə götürdü. Bu əməliyyatların ən mühüm nəticələrindən biri təxminən 2000 hektara yaxın ərazinin işğaldan azad edilməsi oldu ki, bu da uzun illər dəyişməz qalan təmas xəttində ciddi irəliləyiş demək idi. Azad edilən Lələtəpə yüksəkliyi, Cocuq Mərcanlı ətrafı ərazilər, Talış kəndi ətrafındakı yüksəkliklər, Suqovuşan istiqamətində yollar və mövqelər, Gülüstan və Qazaxlar kəndləri istiqamətlərində mövqelər– strateji nəzarət nöqtəsi kimi xüsusi əhəmiyyət daşıyırdı.
“Hərbi-strateji əhəmiyyəti həm də onunla ölçülürdü ki, məsələn, Lələtəpənin azad edilməsi nəticəsində geniş əraziyə vizual və atəş nəzarəti təmin olundu. Talış istiqamətində yüksəkliklərin ələ keçirilməsi düşmənin müdafiə xəttini zəiflətdi. Azad edilən ərazilər yaxın yaşayış məntəqələrinin təhlükəsizliyini artırdı. Beləliklə, Aprel döyüşlərində əldə edilən ərazi üstünlüyü təkcə taktiki nailiyyət deyil, həm də gələcək döyüş əməliyyatların konturlarını müəyyən edən mühüm hərbi-strateji göstərici kimi qiymətləndirilir”, - deyə R.Nəbiyev qeyd edib.
Deputat vurğulayıb ki, Aprel döyüşləri, həmçinin Azərbaycan Ordusunun uzun illər ərzində formalaşdırdığı hərbi potensialın real döyüş şəraitində ilk ciddi sınağı oldu. Buna görə də, şanlı Aprel döyüşləri hərbi müstəvidə həm də “sınaqdan keçmiş güc modeli” kimi dəyərləndirilir. Bu baxımdan, Aprel döyüşləri gələcək genişmiqyaslı müharibə üçün taktiki yanaşmaların test edilməsi, komanda-idarəetmə sisteminin yoxlanılması, real döyüş koordinasiyasının formalaşdırılması kimi mühüm funksiyaları yerinə yetirdi.
“Aprel döyüşlərinə qədər regiondakı mövcud vəziyyət uzun müddət “dondurulmuş münaqişə” kimi təqdim olunurdu və Azərbaycanı bu nəticəni qəbullandırmağa məcbur etmək taktikası həyata keçirilirdi. Lakin Aprel döyüşləri işğal altındakı ərazilərin dəyişməzliyi mifini sarsıtdı, ən mühümü yeni siyasi reallıq formalaşdırdı: status-kvo dəyişdirilə bilər. Bu reallıq daxili müstəvidə dövlət və cəmiyyət arasında birliyin daha da möhkəmlənməsinə əlavə stimul verdi, milli həmrəyliyimiz daha da gücləndi. Diplomatik müstəvidə isə ciddi mesaj xarakteri daşıdı. Uzun illər davam edən, lakin nəticəsiz qalan danışıqlar fonunda Azərbaycan ilk dəfə açıq şəkildə sübut etdi ki, münaqişənin həllində hərbi həll yolu real və tətbiq oluna bilən variantdır”, - deyə o diqqətə çatdırıb.
R.Nəbiyev, həmçinin bildirib ki, Aprel döyüşlərindən sonra Azərbaycan diplomatiyası beynəlxalq platformalarda daha fəal mövqe nümayiş etdirməyə başladı, informasiya müharibəsində üstünlüyünü artırdı. Bu isə gələcək hərbi əməliyyatlar üçün siyasi və hüquqi zəminin formalaşdırılmasına xidmət edirdi. Beləliklə, “güc amili” ərazilərimizin işğaldan azad edilməsi ilə bağlı beynəlxalq müzakirələrdə real və legitim alət kimi qəbul olunmağa başladı.
“Aprel döyüşləri ardıcıl strategiyanın tərkib hissəsidir. Sonrakı dövrdə baş verən proseslər bu xəttin davamı kimi çıxış etdi. Bu kontekstdə Aprel döyüşləri hərbi hazırlığın real sınağı, siyasi iradənin möhkəmlənməsi, diplomatik zəminin formalaşması, cəmiyyətin psixoloji hazırlığı kimi faktorları bir araya gətirərək 2020-ci ildə tammiqyaslı müharibəyə keçidi mümkün etdi. Bir sözlə, Aprel döyüşləri Azərbaycanın sonrakı strateji qalibiyyətinin – Vətən müharibəsindəki Qələbənin – ilkin mərhələsi və konseptual başlanğıcı kimi tarixə düşdü”, - deyə deputat əlavə edib.
jpg-1707830314 - Copyjpg_1775164685.jpg)
