Azərbaycan Dövlət Aqrar Unversiteti (ADAU) dünyanın inkişaf etmiş ölkələrinin universitetləri ilə əməkdaşlığı daha da genişləndirir. Bu əməkdaşlıq siyahısına daha bir universitet də əlavə edilmişdir. Qardaş Türkiyənin Yozgat Bozok Universitetinin  rektoru, professor Ahmet Karadağ başda olmaqla, universitetin nümayəndə heyəti bu məqsədlə ADAU-da olmuşdur.

Azərbaycan Dövlət Aqrar Universitetində türkiyəli qonaqlarla əməkdaşlıq əlaqələrinin qurulması ilə bağlı görüş keçirilmişdir. Görüşdə universitetin rektoru, AMEA-nın müxbir üzvü professor İbrahim Cəfərov çıxış edərək ölkəmizdə yeganə kənd təsərrüfatı mütəxəssisləri yetişdirən bu ali təhsil ocağının xarici əlaqələri, ikili diplom proqramları və maddi-texniki bazası haqqında ətraflı məlumat vermişdir.

ADAU-nun fəaliyyətindən bəhs edən videoçarx nümayiş etdirildikdən sonra  professor Ahmet Karadağ  təmsil etdiyi universitet haqqında geniş məlumat vermişdir. O, toxumçuluq sahəsində birgə layihələrin reallaşdırılması, professor-müəllim heyəti və doktorantlar üçün qarşılıqlı akademik səfərlərin, tələbə mübadiləsinin həyata keçirilməsinin vacibliyini diqqətə çatdırmışdır. Hər iki universitet arasında qarşılıqlı əməkdaşlıq haqqında memorandum imzalanmışdır.

Sonra qonaqlar ADAU-nun Biotexnologiya Mərkəzində olmuşlar. Məlumat verilmişdir ki, Azərbaycan Dövlət Aqrar Universitetinin nəzdində yaradılmış yeni Biotexnologiya Mərkəzində bitkilərin müxtəlif stres amillərinə, xəstəliklərə qarşı davamlılığının müəyyən edilməsi üçün  molekulyar analizlər həyata keçirilir.

S.ƏLİYEV,

"Azərbaycan"