Hər bir Qərbi azərbaycanlının öz ata-baba yurduna qayıtmaq hüququ var və bu, onların qanuni, tarixi və mənəvi haqqıdır. Çünki həmin torpaqlar bizim əzəli yurdlarımızdır.
AZƏRTAC-ın bölgə müxbiri xəbər verir ki, bu sözləri Naxçıvanda jurnalistlərə müsahibəsində Azərbaycan Respublikası Milli Məclisi sədrinin müavini Ziyafət Əsgərov bildirib.
“Bəzən Ermənistan və erməni diasporu tərəfindən belə bir fikir formalaşdırılmağa çalışılır ki, Qərbi Azərbaycana qayıdış hansısa ərazi iddiası deməkdir. Bu, tamamilə əsassız yanaşmadır. Biz yalnız sülh şəraitində, beynəlxalq hüquq normalarına uyğun olaraq öz doğma torpaqlarımıza qayıdıb, orada təhlükəsiz və ləyaqətli şəkildə yaşamaq istəyirik. Eyni zamanda, Qərbi Azərbaycanın tarixi və mədəni irsinin öyrənilməsi, gələcək nəsillərə çatdırılması istiqamətində də mühüm işlər görülür. Hesab edirəm ki, belə tədbirlər bu məqsədlərə xidmət edən mühüm platformalardır”.
Ziyafət Əsgərov vurğulayıb ki, bu gün Azərbaycan və Ermənistan arasında yeni münasibətlər mərhələsinin formalaşması üçün imkanlar yaranıb: "Əgər sülh prosesi uğurla yekunlaşarsa, gələcəkdə insanlar öz doğma torpaqlarına qayıda və həmin ərazilərdə dinc şəraitdə yaşaya bilərlər. Hüquqi baxımdan isə hələ həllini gözləyən məsələlər mövcuddur. Ermənistan Konstitusiyasında Azərbaycana qarşı ərazi iddialarının aradan qaldırılması vacib şərtlərdən biridir. Ermənistan rəhbərliyi bu istiqamətdə referendum keçiriləcəyini bəyan edib. Ümid edirik ki, verilən vədlər yerinə yetiriləcək və bu, iki ölkə arasında münasibətlərin normallaşmasına mühüm töhfə verəcək. Belə olduğu təqdirdə, Azərbaycan və Ermənistan arasında siyasi, iqtisadi və humanitar əlaqələrin inkişafı üçün yeni imkanlar yaranacaq. Əsas məqsədimiz Cənubi Qafqazda uzunmüddətli sülhün və sabitliyin təmin olunması, onilliklər boyu davam edən qarşıdurmalara son qoyulmasıdır"- deyə Milli Məclisin sədr müavini əlavə edib.
Qeyd edək ki, Ordubad şəhərində Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi, Azərbaycan Respublikası Elm və Təhsil Nazirliyi, Naxçıvan Dövlət Universiteti və Qərbi Azərbaycan İcmasının birgə təşkilatçılığı ilə "Qərbi Azərbaycana qayıdış” III festival-konqresi keçirilir.
