“Qazaxıstan Rusiya üçün ən yaxın dövlətlərdən biri və etibarlı müttəfiqdir”.
AZƏRTAC xəbər verir ki, bu barədə Rusiya Prezidenti Vladimir Putin dünyanın aparıcı informasiya agentliklərinin rəhbərləri ilə görüşü zamanı bildirib. Qazaxıstanlı jurnalistin sualını cavablandırarkən Rusiya dövlət başçısı iki ölkə arasında münasibətlərin enerji və logistika sahəsindən tutmuş humanitar, təhsil, hüquq-mühafizə və müdafiə sahələrinədək bütün istiqamətlərdə hərtərəfli inkişaf etdiyini vurğulayıb.
Vladimir Putin xatırladıb ki, tarixən Qazaxıstana qaz tədarükü Rusiyadan həyata keçirilib və hazırda Prezident Kasım-Jomart Tokayevlə bu sahədə tərəfdaşlığın genişləndirilməsi və üçüncü ölkələrin bazarlarına birgə çıxış imkanları müzakirə olunur. O, həmçinin bildirib ki, Qazaxıstan neftinin əsas hissəsi Rusiya ərazisindən ixrac olunur və Moskva nəqliyyat marşrutlarının şaxələndirilməsinə dəstək göstərməyə hazırdır.
Prezident iki ölkənin kosmik sahədə fəal əməkdaşlıq etdiyinə işarə edib və bildirib ki, Rusiya və Qazaxıstan Baykonur kosmodromundan birgə istifadə edir və peyk proqramlarını inkişaf etdirir. Bundan əlavə, ikitərəfli ticarət dövriyyəsinin 95 faizindən çoxu milli valyutalarla aparılır.
Vladimir Putin təhlükəsizlik məsələlərinə də xüsusi diqqət ayırıb. Onun sözlərinə görə, Rusiya və Qazaxıstan mütəşəkkil cinayətkarlığa və terrorizmə qarşı mübarizədə, həmçinin Kollektiv Təhlükəsizlik Müqaviləsi Təşkilatı (KTMT) çərçivəsində uğurlu əməkdaşlıq edirlər. Prezident vurğulayıb ki, KTMT-nin fəaliyyəti xüsusilə də qonşu Əfqanıstandakı qeyri-sabit vəziyyət fonunda regionda təhlükəsizliyin təmin olunmasına yönəlib.
“Aramızda dünyanın ən uzun quru sərhədimiz var və bu, əhəmiyyətli faktordur. Bununla bağlı da münasibətlərimizi inkişaf etdirəcəyik”, – deyə Rusiya lideri bildirib.
