Azərbaycanın son 25 ildə əldə etdiyi sosial-iqtisadi inkişafın nəticələri ölkənin qlobal iqtisadi sistemdə mövqeyinin möhkəmlənməsinə və investisiya imkanlarının genişlənməsinə şərait yaradıb.
AZƏRTAC xəbər verir ki, bu sözləri İkinci Azərbaycan Beynəlxalq İnvestisiya Forumu çərçivəsində “The European House – Ambrosetti” və "TEHA Group"un icraçı direktoru və idarəedici tərəfdaşı Valerio De Molli “Azərbaycan və Cənubi Qafqaz: investisiya artımı üçün mərkəzi hab” mövzusunda təqdimatında deyib.
O bildirib ki, Azərbaycanın inkişaf göstəricilərinin beynəlxalq indikatorlar əsasında təhlili ölkənin bir sıra istiqamətlərdə əhəmiyyətli dinamika nümayiş etdirdiyini göstərir. Bu göstəricilər sırasında iqtisadi inkişaf, innovasiya, açıqlıq, şaxələndirmə, dövlət idarəçiliyinin səmərəliliyi və gələcəyə yönümlülük xüsusi yer tutur.
Valerio De Molli qeyd edib ki, Azərbaycan yalnız Cənubi Qafqaz və digər regional ölkələrlə deyil, həm də yüksək iqtisadi dinamizm nümayiş etdirən dövlətlərlə müqayisə olunmalıdır. Onun sözlərinə görə, son 25 ildə Azərbaycanın ÜDM göstəricilərində yüksək artım dinamikası müşahidə olunub və ölkə qlobal iqtisadi inkişaf baxımından diqqətçəkən nəticələr əldə edib.
“Azərbaycanın iqtisadi inkişaf göstəricilərinə baxdıqda ölkənin bir sıra mühüm istiqamətlərdə dünya üzrə yüksək nəticələr nümayiş etdirdiyini görürük”, – deyə Valerio De Molli vurğulayıb.
O bildirib ki, Azərbaycanın ixrac strukturunun genişlənməsi və şaxələndirilməsi də müsbət tendensiyalardan biridir. Son illərdə qeyri-neft sektorunun inkişafı, müxtəlif məhsulların ixracının artması və yeni bazarlara çıxış imkanlarının genişlənməsi ölkənin iqtisadi potensialını gücləndirib.
Valerio De Molli Azərbaycanın qeyri-neft sektorlarında əldə etdiyi irəliləyişləri də qeyd edib. O, xüsusilə dəri, mineral məhsullar, dəmir və polad kimi məhsulların ixracında artımın qeydə alındığını bildirib.
“Azərbaycanın elmi-tədqiqat və elmi nəşrlər sahəsində də mühüm nəticələri var. 2017-ci ildən etibarən elmi nəşrlərin sayının artımına görə Azərbaycan dünyada doqquzuncu yerdədir”, – deyə o qeyd edib.
"TEHA Group"un icraçı direktoru Azərbaycanın maliyyə sabitliyinin də investisiya mühitinin mühüm elementlərindən biri olduğunu vurğulayıb: “ Ölkənin xarici borcunun ÜDM-ə nisbəti baxımından yüksək mövqedə olması makroiqtisadi sabitliyin göstəricilərindən biridir”.
O, turizm, texnologiya, sənaye və digər qeyri-neft sahələrində inkişafın Azərbaycanın iqtisadiyyatının daha da şaxələndirilməsi baxımından əhəmiyyətli olduğunu bildirib.
Valerio De Molli Azərbaycanın strateji coğrafi mövqeyinin də ölkənin investisiya cəlbediciliyini artıran amillərdən biri olduğunu qeyd edib. Onun sözlərinə görə, Şərq-Qərb və Şimal-Cənub nəqliyyat əlaqələrinin kəsişməsində yerləşən Azərbaycan regional və qlobal iqtisadi əlaqələrin inkişafında mühüm rol oynaya bilər. Cənubi Qafqazın strateji əhəmiyyəti artır və regional əməkdaşlığın genişləndirilməsi davamlı iqtisadi inkişaf, yeni investisiyaların cəlb olunması və uzunmüddətli tərəfdaşlıqların qurulması üçün mühüm əhəmiyyət daşıyır.
O, qlobal iqtisadi düzəndə baş verən dəyişikliklərə də diqqət çəkərək BRICS ölkələrinin dünya iqtisadiyyatında çəkisinin artdığını qeyd edib: “ Qlobal iqtisadi mərkəzlərdə baş verən dəyişikliklər yeni əməkdaşlıq və investisiya imkanları yaradır”.
“Azərbaycan və Cənubi Qafqaz: investisiya artımı üçün mərkəzi hab” mövzusundakı təqdimatında Valerio De Molli Azərbaycanın dinamik və perspektivli investisiya məkanı kimi artan rolunu xüsusi vurğulayıb.
O əlavə edib ki, Azərbaycan Qafqazda yeganə ölkədir ki onun regionda ilk süni intellekt strategiyası və iki data mərkəzi var.
677jpg_1790033437.jpg)
jpeg_1790332394.jpeg)
