Bu gün ölkənin qeyri-neft sektorunun qarşısında duran əsas hədəflərdən biri Azərbaycan məhsullarının xarici bazarlara çıxışını təmin etmək, ölkənin ixrac potensialını artırmaq və "Made in Azerbaijan" brendini dünyada tanıtmaqdır. Bu istiqamətdə atılan addımlar sırasında xaricdəki Ticarət evləri xüsusi qeyd olunmalıdır.
İlk dəfə bu barədə danışarkən Prezident İlham Əliyev demişdir: "Bu, həm ölkəmizi təbliğ edəcək, həm də ixracatçılar üçün yeni imkanlar yaradacaqdır. Bununla bərabər, Asiya qitəsinin böyük ölkələrində mütləq Ticarət evlərimiz olmalıdır. İndi Körfəz ölkələrində bizim məhsullarımıza böyük maraq göstərilir. Əslində, bu marağın da mənbəyi bizim fəaliyyətimizdir".
Son illər Azərbaycan Prezidentinin tapşırığına uyğun olaraq, yerli məhsulların ixracının dəstəklənməsi, ixrac həcminin və coğrafiyasının genişləndirilməsi, eləcə də "Made in Azerbaijan" brendinin daha çox tanıdılması və ixracını həyata keçirmək məqsədilə xarici ölkələrdə Ticarət evləri yaradılır. Artıq Rusiya, Belarus, Ukrayna, Polşa, Birləşmiş Ərəb Əmirlikləri, Qətər, Latviya, Çin, Qazaxıstanda Azərbaycanın Ticarət evləri fəaliyyət göstərir.
Xəbər verildiyi kimi, bir neçə gün əvvəl Çinin paytaxtı Pekində Azərbaycan Ticarət Evinin açılış mərasimi keçirilmişdir. Bununla əlaqədar təşkil olunmuş tədbirdə hər iki ölkənin rəsmi şəxsləri, sahibkarlar və Çində akkreditə olunmuş diplomatik korpusun nümayəndələri iştirak etmişlər. Prezidentin tapşırığı ilə İqtisadiyyat Nazirliyi tərəfindən yaradılmış Azərbaycan Ticarət Evi "Made in Azerbaijan" brendinin Çin bazarında daha çox tanıdılmasına, ölkəmizdə istehsal olunan məhsulların ixrac coğrafiyasının genişləndirilməsinə dəstək göstərəcək, bu sahədə əlaqələndirici rol oynayacaq.
Bu, Azərbaycanın Çində sayca 4-cü Ticarət Evidir. Digər 3 Ticarət Evi Çinin başqa şəhərlərində - Çindao, Çendu və Canciaciyedə uğurla fəaliyyət göstərir. Bundan əlavə, Azərbaycanın Şanxay, Harbin, Cinan və Vuhanda 4 ticarət bölməsi var. Urumçi və Şanxay kimi şəhərlərdə isə 3 Azərbaycan Şərab Evi yaradılıb. Asiya regionu kimi Çin bazarı şərab məhsullarının əsas istehlakçısı kimi Azərbaycana böyük perspektiv vəd edir.
Xatırladaq ki, İqtisadiyyat Nazirliyi "Made in Azerbaijan" brendi altında qeyri-neft məhsullarının ixracının artırılması məqsədilə xaricdə Ticarət evlərini 2017-ci ildə yaratmağa başlayıb. Azərbaycanın ilk Ticarət Evi həmin il Minskdə açılıb. 2018-ci ildə isə Kiyev, Riqa və Varşavada Ticarət evləri fəaliyyətə başlayıb. Bir il sonra BƏƏ-də də Ticarət Evi yaradılıb. Daha sonra bu iş bir sıra MDB ölkələrində həyata keçirilib. Asiya qitəsi və Körfəz ölkələri də unudulmayıb.
Bəs, xaricdə açılan Ticarət evləri həm təbliğat, həm də ixrac imkanlarımızın genişləndirilməsi baxımından nə dərəcədə effektlidir? Ümumiyyətlə, Ticarət evləri iqtisadi cəhətdən Azərbaycana nə verir?
Öncə bildirək ki, Ticarət evləri məhsullarımızın daha geniş coğrafiyaya ixrac edilməsi və daha çox xarici ölkələrlə xarici ticarət əlaqələrinin yaradılmasına xidmət edir. Eləcə də bu, ondan xəbər verir ki, Azərbaycan təkcə neft yox, həm də qeyri-neft məhsulları istehsal və ixrac edən ölkədir. Üstəlik, Ticarət evləri Azərbaycana yeni bazarlara çıxış imkanı verir. Eyni zamanda bu evlər vasitəsilə Azərbaycan sahibkarları xarici ölkələrdə fərqli sektorlardakı vəziyyəti öyrənir, bazarlarda marketinq araşdırmaları aparmağa fürsət qazanırlar.
Bütün bunlar onu deməyə əsas verir ki, xaricdəki Ticarət evləri Azərbaycanın ticarət potensialının artırılması, qarşılıqlı əməkdaşlığın gücləndirilməsi və ölkəyə xarici investisiyanın cəlb edilməsi baxımından uğurlu bir layihədir. Artıq ölkəmizin xarici tərəfdaşları da etiraf edirlər ki, Azərbaycanın böyük ixrac potensialı var və Ticarət evləri həmin potensialı reallaşdırmaq üçün uğurlu vasitədir. Bu yerdə ölkəmizin xaricdə fəaliyyət göstərən səfirlik və konsulluqlarında ticarət nümayəndəliklərinin yaradılmasını və onların səmərəli fəaliyyətini də unutmamalıyıq.
Züleyxa ƏLİYEVA,
"Azərbaycan"
jpg_1765800788.jpg)
