Olimpiya Oyunlarında Beynəlxalq Olimpiya Komitəsi tərəfindən təqdim edilən simvollardan - nişanlar, bayraqlar və rəmzlərdən istifadə edilir.
Oyunların ən əvəzolunmaz simvollarından biri daim yanar Olimpiya məşəlidir. Mifik görüşlərə görə, bu məşəli Prometey Zevsdən oğurlayıb. Müasir Olimpiya oyunlarında ilk dəfə məşəl 1928-ci ildə Amsterdamda keçirilən oyunlarda istifadə olunmuşdu. Məşəl oyunların başlamasından bir neçə ay əvvəl onun ilk alovlandırıldığı yer olan Olimpiyada yandırılır. Orada yerləşən Hera məbədinin qarşısında bir qadın məşəli yandıraraq digərinə verir və əldən-ələ ötürülərək oyunların keçiriləcəyi yerə gətirilir. Oyunlar bitənə qədər məşəl yanar halda saxlanılır. Yarışlar bitdiyi günün sonunda isə söndürülür. Olimpiya oyunlarında yandırılan məşəl sülhün simvolu kimi tanınır.
Digər bir rəmz Olimpiya halqalarıdır. 5 iç-içə keçirilmiş bu rəngli halqalar Olimpiyanın möhürüdür. Özünəməxsus görüntüsü milyardlarla düşüncədə yalnız bir fikri canlandırır - Olimpiya oyunlarını. Halqalar müasir Olimpiya oyunlarının banisi Piyer de Kubertenin dizaynı əsasında hazırlanıb. Eyni ölçüdə 5 bir-birinə bağlı bu simvolun mavi, qara, qırmızı rəngləri yuxarıda, sarı, yaşıl rəngləri isə aşağıda yerləşir. Bu rənglərin hər biri dünyanın 5 qitəsini təmsil edir; mavi - Avropanı, sarı - Asiyanı, qara - Afrikanı, yaşıl - Avstraliyanı, qırmızı - Amerikanı. Halqaların məhz bu rənglərdən ərsəyə gətirilməsi isə dünyadakı bütün ölkələrin bayraqlarından seçilmiş rənglərin hesabınadır.
Olimpiya oyunlarının şüarı olaraq qəbul edilən və latınca ifadə olunan bu sözlər “Citius, Altius, Fortius” tərcümədə daha sürətli, daha yüksək, daha güclü mənalarını verir. Yəni şüarda da oyunlarda qalib gəlmək üçün 3 xüsusiyyətin önəmi bir daha vurğulanır.
Bütün bu qəbul edilmiş və dəyişməz olan simvollarla yanaşı, Olimpiya oyunlarının keçirildiyi ölkədəki açılış və bağlanış mərasimlərində xüsusi hazırlanan simvollardan da istifadə edilir.
