Şanxay Əməkdaşlıq Təşkilatının (ŞƏT) Qırğızıstanın paytaxtı Bişkek şəhərində keçirilən sammitində dialoq tərəfdaşı statusunda və ya xüsusi dəvətlə yüksək səviyyədə təmsil olunan ölkələrin siyahısında yer alan Azərbaycan bu nəhəng məkanla yalnız ikitərəfli əlaqələr vasitəsilə deyil, institusional əməkdaşlıq çərçivəsində də sıx bağlıdır. Belə ki, Azərbaycanın 2015-ci ildən ŞƏT-in dialoq tərəfdaşı statusu qazanması ölkəmizin təşkilatın siyasi, iqtisadi, nəqliyyat, enerji, təhlükəsizlik və humanitar gündəliyi ilə əlaqələrini genişləndirməsinə imkan verib. Bildiyimiz kimi, Şanxay Əməkdaşlıq Təşkilatı dünyanın aparıcı regional və beynəlxalq əməkdaşlıq platformalarından biridir. Azərbaycanın xarici ticarət əlaqələrinə nəzər saldıqda da ŞƏT məkanının ölkəmiz üçün xüsusi əhəmiyyət daşıdığı görürük.
Bu fikirləri AZƏRTAC-a açıqlamasında Milli Məclisin deputatı Müşfiq Cəfərov deyib.
O xatırladıb ki, ölkəmizin ən böyük xarici ticarət tərəfdaşlarından 4-dən 3-ü məhz bu təşkilatda təmsil olunur. Onlardan 2-si ŞƏT-in tamhüquqlu üzvü, 1-i isə tərəfdaş dövlət statusuna malikdir. Bu da Azərbaycanın artıq təşkilat məkanına daxil olan ölkələrlə dərin və çoxşaxəli ticarət-iqtisadi əlaqələr formalaşdırdığını göstərir.
“Azərbaycanın ŞƏT məkanındakı mövqeyini gücləndirən əsas amillərdən biri də Mərkəzi Asiya dövlətləri ilə əlaqələrin sürətlə inkişaf etməsidir. Bu baxımdan, ŞƏT-in 2026-cı ildə Qırğızıstanın paytaxtı Bişkekdə keçiriləcək Zirvə toplantısı xüsusi əhəmiyyət daşıyır. Hazırda bu iqtisadi məkan ölkəmiz üçün həm mövcud ticarət əlaqələri, həm də nəqliyyat, logistika, investisiya, sənaye və enerji imkanlarının genişləndirilməsi baxımından xüsusi əhəmiyyət daşıyır. 2025-ci ildə Azərbaycanın ümumi xarici ticarət dövriyyəsi 48,9 milyard dollar təşkil edib. Bu dövriyyənin 10 faizi Rusiyanın, 9,9 faizi Çinin, 1,6 faizi Özbəkistanın, 1,4 faizi Qazaxıstanın, 1,3 faizi isə İranın payına düşüb. Bu ölkələr ŞƏT üzvləridir. Göstəricilər, heç şübhəsiz, ŞƏT üzvlərinin Azərbaycan üçün artıq real və əhəmiyyətli iqtisadi tərəfdaşlara çevrildiyini göstərir”, - deyə M.Cəfərov deyib.
