Neftçala Olimpiya İdman Kompleksində Şirvan-Salyan regionu üzrə keçirilən zona birinciliyində Şirvan şəhərindən, Biləsuvar, Hacıqabul, Neftçala və Salyan rayonlarının hər birindən 14 nəfər olmaqla 5 komanda iştirak edib.
Açılış mərasimində çıxış edən Neftcala Rayon İcra Hakimiyyətinin başçısı M.Seyidov bildirib ki, müasir dövrdə ölkəmizdə gənc nəslin vətəndaş kimi formalaşması, mənəvi və fiziki cəhətdən hərtərəfli inkişafı və şəxsiyyət kimi kamilləşməsi prosesi cəmiyyətin qarşısında duran əsas vəzifələrdən biridir: "Şahin" hərbi-idman oyunlarının özünəməxsus xüsusiyyətlərə malik olmaqla hər bir gəncin Vətənə xidmətdə öz rolunu və yerini dərindən dərk etməsini, yüksək şəxsi məsuliyyətin, hərbi vəzifəni yerinə yetirmək üçün lazımi keyfiyyət və bacarıqların formalaşdırılmasının zəruriliyi ilə xarakterizə olunduğunu deyən natiq onu da vurğulayıb ki, 44 günlük Vətən müharibəsində Azərbaycan gənci öz vətənpərvərliyini, əzmini bütün dünyaya nümayiş etdirmişdir".
Açılış mərasimindən sonra yarışlara start verilib. Məktəblilər sıra hazırlığı, maneələri dəf etmə, avtomatın sökülüb-yığılması, 100 metr məsafəyə qaçış, turnikdə dartınma, mülki müdafiə hazırlığı, sanitarların yarışı və digər mərhələlər üzrə qüvvələrini sınayıblar. Hərbi-idman oyunlarının sonunda qiymətləndirməyə əsasən ən yüksək bal toplayan Şirvan şəhərini, Neftçala və Hacıqabul rayonlarını təmsil edən komandalar müvafiq olaraq ilk üç yerə layiq görülüblər.
Qeyd edək ki, Gənclər və İdman, Müdafiə, Elm və Təhsil, Fövqəladə Hallar nazirlikləri, Səfərbərlik və Hərbi Xidmətə Çağırış üzrə Dövlət Xidmətinin birgə təsdiqlədiyi Əsasnaməyə uyğun olaraq respublikanın ümumtəhsil müəssisələrinin şagirdlərinin iştirakı ilə təşkil edilən "Şahin" hərbi-idman oyunlarının keçirilməsində əsas məqsəd məktəblilərdə vətənpərvərlik tərbiyəsinin gücləndirilməsi, onların mənəvi-psixoloji və hərbi-fiziki hazırlığının, eləcə də hərbi xidmətə hazırlıq səviyyəsinin yüksəldilməsindən və "Şanlı Zəfər" tarixinin təbliğ edilməsindən ibarətdir.
"Azərbaycan"
jpg_1776428736.jpg)
jpg_1775472819.jpg)
