Çində təhlükəsizliklə bağlı narahatlıqlar səbəbindən paytaxt Pekində dronların satışı və istifadəsi ilə bağlı yeni, daha sərt qaydalar qüvvəyə minir.
“BBC” xəbər verir ki, yeni tənzimləmələrə əsasən, dronların və onların əsas komponentlərinin şəhərə satılması, icarəyə verilməsi və ya gətirilməsi qadağan ediləcək.
Qaydalar çərçivəsində dron sahiblərindən cihazlarını polis orqanlarında qeydiyyatdan keçirmək tələb olunacaq. Bundan əlavə, Pekində açıq havada dron uçuşları yalnız əvvəlcədən rəsmi icazə alındıqdan sonra mümkün olacaq. İstifadəçilər, həmçinin onlayn təlim keçməli və müvafiq testdən uğurlu nəticələr əldə etməlidirlər. Həmçinin yeni qaydalara görə, əgər istifadəçilər cihazlarını təmir üçün şəhərdən kənara göndərmək istəsələr, dronu poçtla deyil, şəxsən aparıb-gətirmələri tələb olunur.
Dövlət rəsmiləri bildiriblər ki, bu addımların məqsədi ictimai təhlükəsizliyi gücləndirmək və hava məkanının idarə olunmasında mövcud çətinlikləri aradan qaldırmaqdır. Pekin hakimiyyəti texnoloji inkişafla təhlükəsizlik arasında balans yaratmağın vacibliyini vurğulayır.
Qeyd edək ki, Çin son illərdə dron istifadəsi ilə bağlı qaydaları mərhələli şəkildə sərtləşdirir. Ölkədə dronlar kənd təsərrüfatı, qida çatdırılması və bina təmizliyi kimi sahələrdə geniş istifadə olunur və bu sektor iqtisadiyyatın mühüm hissəsi hesab edilir. Bu sahənin 2035-ci ilə qədər böyük iqtisadi gəlir gətirəcəyi proqnozlaşdırılır. Bununla belə, yeni məhdudiyyətlər bazara da təsir göstərə bilər. Rəsmi məlumatlara görə, Çində artıq üç milyondan çox qeydiyyatdan keçmiş dron mövcuddur. Ölkə, eyni zamanda, dünyanın ən böyük dron istehsalçılarından biri olan “DJI” kimi şirkətlərə ev sahibliyi edir.
Çin qlobal dron bazarında lider mövqeyini qorusa da, ölkə daxilində bu texnologiyanın istifadəsi getdikcə daha ciddi nəzarət altına alınır.
Təhminə VERDİYEVA,
“Azərbaycan”
