Dövlətin hərtərəfli diqqət və qayğısı ilə əhatə olunan Azərbaycan gəncliyi cəmiyyətin ictimai-siyasi, sosial-iqtisadi və mədəni həyatında fəal iştirak edir. Gənclərin potensialının üzə çıxarılması, onların intellektual, fiziki və mənəvi inkişafının təmin edilməsi, dövlətçilik prinsiplərinə sadiq, vətənpərvər və rəqabətqabiliyyətli kadrlar kimi formalaşdırılması ölkəmizdə həyata keçirilən dövlət siyasətinin əsas prioritet istiqamətlərindəndir. Uzun illərdir həyata keçirilən bu siyasət gənclərin yalnız bugünkü deyil, eyni zamanda gələcək inkişaf proseslərində də aparıcı rol oynamasına yol açır.
Xalqımızın Ümummilli Lideri Heydər Əliyev tərəfindən əsası qoyulan dövlət gənclər siyasəti müasir Azərbaycan gəncliyinin formalaşmasında mühüm rol oynayıb. Ulu Öndər gəncləri cəmiyyətin strateji resursu kimi qiymətləndirərək, onların bilik və bacarıqlarının ölkənin inkişafı naminə səfərbər edilməsini əsas vəzifələrdən biri kimi müəyyənləşdirmişdir. Məhz bu yanaşma nəticəsində gənclərin azərbaycançılıq ideologiyası, milli-mənəvi dəyərlər, dövlətçilik və vətənpərvərlik prinsipləri əsasında formalaşması üçün mühüm addımlar atıldı.
Möhtərəm Prezident İlham Əliyevin rəhbərliyi ilə dövlət gənclər siyasəti dövrün çağırışlarına uyğunlaşdırılaraq uğurla davam etdirilir. Gənclərlə bağlı dövlət proqramlarının qəbulu, institusional mexanizmlərin yaradılması, sosial, təhsil və məşğulluq sahələrində məqsədyönlü təşəbbüslərin həyata keçirilməsi gənclərin cəmiyyət həyatında fəallığını əhəmiyyətli dərəcədə artırıb. Bu siyasət gənclərin müasir biliklərə yiyələnməsinə, innovativ düşüncə tərzinin formalaşmasına və qlobal rəqabət mühitinə uğurla inteqrasiya olunmasına geniş imkanlar yaradıb.
Azərbaycan gəncliyinin Vətən müharibəsində göstərdiyi yüksək vətənpərvərliyi və qəhrəmanlıqları xüsusi qeyd etmək istərdim. Bu, dövlət gənclər siyasətinin real və praktik nəticələrini nümayiş etdirdi. Qürurla deyə bilərik ki, dövlətimizin başçısı cənab İlham Əliyevin hakimiyyəti illərində formalaşmış gənclərimiz ölkəmizin suverenliyi və ərazi bütövlüyü uğrunda aparılan mübarizədə milli birliyimizin əsas dayaqlarından birinə çevrildilər.
Eyni zamanda gənclərin xarici ölkələrin nüfuzlu ali təhsil müəssisələrində təhsil almalarına şərait yaradan dövlət proqramları, könüllülük hərəkatının genişlənməsi, liderlik və idarəçilik bacarıqlarını inkişaf etdirən təşəbbüslər onların şəxsi və peşəkar inkişafına mühüm töhfələr verir. Bu uğurlu mexanizmlər gənclərin ictimai məsuliyyət hissini gücləndirir, onların təşəbbüskarlığını və sosial fəallığını artırır.
Gənclərimiz üçün ölkəmizin müxtəlif bölgələrində yaradılan müasir infrastruktur, intellektual və yaradıcı mühit onların asudə vaxtlarının daha səmərəli təşkilinə, inkişaflarına mühüm təkan verir. Bu, həmçinin regionlarda yaşayan gənclərin potensialının üzə çıxarılmasına xidmət edir və onların cəmiyyətin fəal üzvləri kimi formalaşmasına, sosial və mədəni proseslərdə yaxından iştiraklarına imkan yaradır.
Gənclərimizin əldə etdiyi uğurlardan danışarkən təbii ki, idman sahəsini xüsusi vurğulamaq lazımdır. Bu istiqamətdə yaradılan geniş imkanlar, müasir idman infrastrukturları, sağlam həyat tərzinin təşviqi istiqamətində görülən işlər gənclərin idmana olan marağını daha da artırıb. Bu gün gənclərimiz müxtəlif idman yarışlarında ölkəmizi uğurla təmsil edir, böyük qələbələrə imza atırlar.
Bütövlükdə, dövlətin ardıcıl, məqsədyönlü və sistemli siyasəti nəticəsində Azərbaycan gəncliyi cəmiyyətin aparıcı qüvvələrindən birinə çevrilib. Azərbaycan dövlətinin uğurlu gənclər siyasəti nəticəsində formalaşan, yüksək bilik və bacarıqlara, güclü vətənpərvərlik ruhuna malik, milli-mənəvi dəyərlərə bağlı gənc nəsil ölkəmizin parlaq gələcəyinin təzahürüdür.
Şahin İSMAYILOV,
Milli Məclisin Gənclər və idman komitəsinin sədri
jpg_1770045900.jpg)
