Son 4 ildə Azərbaycanda bank kartlarının sayı 2021-ci ilin I rübünün sonu (10 milyon 126 min 70 kart) ilə müqayisədə 2 dəfədən çox, daha dəqiq desək, 10 milyon 333 min 840 ədəd artıb.
MTM-dən AZƏRTAC-a bildirilib ki, bu da o deməkdir ki, ölkədə adambaşına düşən aktiv bank kartlarının sayı təxminən 2-yə bərabərdir.
Qeyd edək ki, 2025-ci ilin I rübünün sonuna olan məlumata görə, ölkədə aktiv olan bank kartlarının sayı son bir ildə 17,4 faiz və ya 3 milyon 38 min 782 ədəd artaraq 20 milyon 459 min 910-a çatıb. Ötən ilin I rübündə isə bu göstərici 17 milyon 421 min 128-ə bərabər idi.
Rəsmi rəqəmlərə əsasən, hazırda Azərbaycanda aktiv olan bank kartlarının böyük hissəsini debet kartlar təşkil edir. Ölkədəki aktiv bank kartlarının 88,87 faizi və ya 18 milyon 181 min 786 ədədi məhz debet kartlardır. Kredit kartlarının sayı 2 milyon 278 min 124-ə bərabərdir ki, bu da ümumi kart sayının 11,13 faizi deməkdir. Əhalinin istifadəsində olan çoxsaylı debet kartların 18,63 faizini və ya 3 milyon 387 min 683 ədədini sosial kartlar (pensiya, müavinət və s.), 15,99 faizini və ya 2 milyon 906 min 633 ədədini isə əməkhaqqı kartları təşkil edir. Qalan 11 milyon 884 min 470 debet kart isə əhalinin əlavə istifadə üçün banklardan aldığı debet kartlardır. Bu kartlar ümumi debet kartların 65,38 faizinə bərabərdir.
Hər ötən il ərzində bank kartları ilə edilən nağdsız ödəmələrin həcmində sürətli artım qeydə alınır. Belə ki, cari ilin yanvar-mart aylarında ölkədaxili aparılan nağdsız əməliyyatların həcmi 20,6 milyard manat (20 milyard 595 milyon 819 min 549 manat) təşkil edib ki, bu da ötən ilin eyni dövrü ilə müqayisədə 27,2 faiz və ya 4,4 milyard manat (4 milyard 398 milyon 861 min 769 manat) çoxdur.
Xatırladaq ki, 2021-ci ilin I rübündə ölkədə qeydə alınan nağdsız ödənişlərin həcmi cəmi 2,08 milyard dollar təşkil edirdi. Bu o deməkdir ki, cari ilin I rübündə qeydə alınan göstərici 4 il əvvəlki illə müqayisədə 9,9 dəfə və ya 18,52 milyard manat (18 milyard 518 milyon 958 min 591 manat) artıb.
Digər maraqlı göstərici əhalinin bank kartlarındakı vəsaitini nağdlaşdırması ilə bağlı olub. 2021-ci ilin I rübündə əhali bank kartlarındakı vəsaitin cəmi 26,98 faizini nağdsız ödənişlərdə istifadə edirdisə, 2025-ci ilin I rübündə bu göstərici 67,04 faizə bərabər olub. Cari ilin I rübündə ölkədə bank kartları vasitəsilə aparılan nağdlaşdırma əməliyyatlarının həcmi isə ümumi kart əməliyyatları həcminin 32,96 faizini təşkil edib.
Cənubi Qafqaz ölkələrinin Mərkəzi Banklarının açıqladığı rəqəmlərin müqayisəsi göstərir ki, Azərbaycan aktiv bank kartı sayına görə digər ölkələri geridə qoyub. 2025-ci ilin I rübünün sonuna olan məlumata əsasən, Azərbaycandakı aktiv bank kartlarının sayı ötən ilin eyni dövrü ilə müqayisədə 17,4 faiz və ya 3 milyon 38 min 782 ədəd artaraq 20 milyon 459 min 910-a çatıb. Gürcüstanda son bir ildə bank kartlarının sayı 11,4 faiz və ya 1 milyon 21 min 537 ədəd artaraq 9 milyon 980 min 643-ə bərabər olub. Ermənistan Mərkəzi Bankının son məlumatına əsasən, ötən ilin sonunda bu ölkədəki bank kartlarının sayı 4 milyon 327 min 728 ədəd təşkil edib. Bu say son bir ildə 16,3 faiz və ya 605 min 676 ədəd artıb.
jpg_1747060777.jpg)
