Ölkəmizin Belarusdakı səfirliyindən AZƏRTAC-a verilən məlumata görə, aprelin 19-da Minskdə informasiya-kommunikasiya texnologiyaları (İKT) sahəsində Belarus-Azərbaycan biznes-forumu keçirilib.
Forumda Azərbaycanın rabitə və yüksək texnologiyalar naziri Ramin Quluzadə, Belarusun rabitə və informatlaşdırma naziri Sergey Popkov, Azərbaycanın Belarusdakı səfirliyinin müşaviri Zülfüqar Tanrıverdi, hər iki dövlətin iri informasiya texnologiyaları şirkətlərinin, o cümlədən Azərbaycanın Rabitə və Yüksək Texnologiyalar Nazirliyinin İnformasiya-Hesablama Mərkəzinin, “Azertelecom”, “Sinam”, “AzDataCom” və digər şirkətlərin nümayəndələri iştirak ediblər.
Forumun məqsədi ikitərəfli qarşılıqlı faydalı əməkdaşlığın daha da inkişaf etdirilməsi, rabitə və informatlaşdırma sahəsində Belarusun və Azərbaycanın dövlət orqanlarının qarşılıqlı əlaqələrini möhkəmlətməkdir.
Tədbirin gedişində hər iki ölkənin informasiya texnologiyaları potensialı, İKT sahəsində aparıcı istehsalçıların məhsullarını və xidmətlərini təbliğ etmək imkanları təqdim olunub, Belarus və Azərbaycan şirkətləri arasında təcrübə mübadiləsi aparılıb, tərəfdaşlıq münasibətləri qurulub.
Forum çərçivəsində informasiya texnologiyaları məhsullarının satışı barədə ikitərəfli sazişlər və kontraktlar imzalanıb. Forum iştirakçıları aktual ikitərəfli əməkdaşlığın istiqamətlərini müəyyən edib, İKT sahəsində Belarus ilə Azərbaycanın zəruri qarşılıqlı fəaliyyətinin təmin edilməsinə dair tədbirlər görüblər.
Zeynal Ağazadə
AZƏRTAC-ın xüsusi müxbiri
Minsk
