Xəbər verdiyimiz kimi, Bakı şəhərində “BakuBus” MMC-yə məxsus bütün avtobus marşrutlarında NFC sistemini dəstəkləyən yerli bank kartları, eləcə də “Apple Pay” və “Google Pay” vasitəsilə nağdsız ödəniş mexanizmi tam aktivləşdirilib. Bu yenilik ödəniş zamanı yaranan gecikmələrin və sıxlığın azalmasına kömək edə bilərmi? Həmçinin gələcəkdə digər avtobus daşıyıcıları və şəhər nəqliyyatında vahid ödəniş sisteminə keçid üçün hansı imkanlar yaradır?
Nəqliyyat üzrə ekspert Rauf Ağamirzəyev AZƏRTAC-a açıqlamasında bildirib ki, artıq sərnişinlər üçün bir neçə ödəniş variantı mövcuddur: əvvəlki plastik “BakıKart”, “QR bilet”, indi isə NFC kartlar, “Apple Pay” və “Google Pay”. Bu müxtəlif ödəniş üsulları bir növə bağlılığı azaldır və sərnişinlər üçün seçim imkanı yaradır.
Ekspertin sözlərinə görə, paytaxta gələn turistlər əvvəllər milli valyuta alıb “BakıKart” əldə etməli idilər ki, bu problem artıq aradan qalxır: “Sıxlıq və tıxaclara təsirinə gəlincə isə, ödəniş üsullarının çeşidliliyi avtobusların daha rahat və sürətli hərəkətinə imkan yaradır, amma bu yalnız ödəniş sisteminin özü ilə həll olunmur. Avtobuslarda validasiya – sərnişinlərin ödəniş etməsinin yoxlanması hələ də vacibdir. Nəzarətçilər müəyyən dayanacaqlarda sərnişinləri yoxlaya bilər, ödəniş etməyənlərə qarşı isə sərt cərimələr tətbiq olunur. Bu praktika dünyada geniş istifadə olunur”.
Ekspert, həmçinin əlavə edir ki, qonşu Gürcüstanda bu sistem 2022-ci ildən tətbiq olunur, Avropanın bir çox şəhərlərində isə illərdir işləyir.
Gələcəkdə sistemin inkişafı üçün vacib məqamlar:
-Hər qapıda sərnişin ödənişinin yoxlanması (validasiya)
-Nəzarətçilərin təmin edilməsi
-Günlük və aylıq bilet paketləri
-Güzəştli qrupların ödənişi
-Tranzit vaxtlarının təyin edilməsi
Bu addımlar ictimai nəqliyyatın cəlbediciliyini artırır və vətəndaşların maliyyə xərclərinin optimallaşmasına birbaşa təsir göstərir.
