Marko RUBİO: "Donald Tramp müharibənin bitməsini istəyir, lakin səbri tükənir"
ABŞ-nin Dövlət katibi Marko Rubio Parisdə Avropa rəsmiləri ilə görüşdən sonra xəbərdarlıq edib ki, Vaşinqton Ukraynada döyüşlərin bitməsini istəyir, lakin bu, onların müharibəsi deyil.
Vaşinqton yaxın vaxtlarda Ukraynada atəşkəsin mümkün olub-olmadığı barədə qərar verməlidir. Bu barədə aprelin 18-də Fransanın paytaxtını tərk edən ABŞ Dövlət katibi Marko Rubio Paris-Le Burje Hava Limanında bildirib.
Rubionun fikrincə, sülhə nail olmaq mümkündürsə, onlar iştirak edəcəklər, mümkün deyilsə, o zaman diqqət yetirməli olduqları başqa prioritetlər var.
"The New York Times" qəzetinin yazdığına görə, ABŞ Dövlət Departamentinin rəhbəri xatırladıb ki, Prezident Donald Tramp bu müharibəyə son qoymaq üçün dəfələrlə səy göstərib. İndi iş o yerə çatıb ki, bunun mümkün olub-olmamasına qərar verilsin.
Qəzet əlavə edib ki, aprelin 17-də Amerika, Avropa və Ukrayna rəsmiləri arasında keçirilən danışıqlar, əslində, Tramp administrasiyası ilə Avropanı Ukraynadakı müharibə ilə bağlı yaxınlaşdırmağa yönəlmiş ilk görüş olub. Rəsmi Vaşinqton ümid edir ki, Böyük Britaniya, Fransa və Almaniya hər şeyi irəli aparmağa kömək edəcək.
Rubio Parisdəki danışıqların konstruktiv keçdiyini bildirib. Eyni zamanda, görünür ki, Trampın səbri tükənməkdədir: "Biz istərdik ki, avropalılar iştirakda qalsınlar... Düşünürəm ki, Böyük Britaniya, Fransa və Almaniya bizə məsələni irəli aparmağa və onun həllinə yaxınlaşmağa kömək edə bilərlər. Hesab edirəm ki, onlar öz ideyaları ilə çox konstruktiv idilər".
Paris danışıqlarında iştirak edən rəsmilər gələn həftə Londonda görüşməyə razılaşıblar və Rubio onun da iştirak edə biləcəyini deyib.
ABŞ-nin baş diplomatı ümid etdiyini bildirib ki, Avropa ölkələri Rusiyaya qarşı onun Ukraynaya genişmiqyaslı işğalından sonra tətbiq edilən sanksiyaları ləğv etməyi nəzərdən keçirəcəklər.
Parisdəki görüşdə ABŞ nümayəndə heyətini Dövlət katibi Marko Rubio, Donald Trampın Ukrayna üzrə xüsusi nümayəndəsi Keyt Kelloq və ABŞ liderinin xüsusi nümayəndəsi Stiven Uitkoff təmsil ediblər. Danışıqlarda rəsmi Kiyev tərəfindən Ukrayna Prezidenti Vladimir Zelenskinin aparatının rəhbəri Andrey Yermak, Xarici İşlər Nazirliyinin rəhbəri Andrey Sıbiqa və müdafiə naziri Rustem Umerov iştirak ediblər.
Almaniya tərəfindən Xarici İşlər Nazirliyinin siyasi direktoru Günter Sautter və Federal hökumətin xarici siyasət və təhlükəsizlik siyasəti üzrə müşaviri Yens Plötner danışıqlara qatılıblar.
ABŞ Dövlət Departamentinin sözçüsü Temmi Brüs Vaşinqtonun bütün tərəflərə güclü və davamlı sülhün konturlarını açıqladığını iddia edib, lakin detallar barədə məlumat verməyib.
Brüsun bildirdiyinə görə, Paris görüşündən sonra Marko Rubio Rusiyanın xarici işlər naziri Sergey Lavrova telefon danışığında ABŞ komandasının Parisdəki Ukrayna nümayəndə heyətinə və Vaşinqtonun avropalı müttəfiqlərinə verdiyi eyni mesajı çatdırıb: "Prezident Donald Tramp və ABŞ bu müharibənin bitməsini istəyirlər".
Rusiya Xarici İşlər Nazirliyi Rubionun Lavrovla danışığı faktını təsdiqləyib.
Rizvan CƏFƏROV,
"Azərbaycan"
