İlham Əliyevin Davos diplomatiyası

Azərbaycan siyasi-iqtisadi və strateji tərəfdaşlarının sayını artırır

Prezident İlham Əliyevin Davos Dünya İqtisadi Forumunda (WEF) iştirakı Azərbaycanın xarici siyasətinə həm iqtisadi, həm də siyasi dividendlər gətirən strateji bir addım oldu. Davos forumu, sadəcə, iqtisadi konfrans deyil, dünya elitasının, dövlət başçılarının, nəhəng şirkətlərin və beyin mərkəzlərinin toplandığı nüfuzlu qlobal platformadır. Azərbaycan bu platformadan istifadə edərək özünün iqtisadi modelini, enerji təhlükəsizliyindəki rolunu və nəqliyyat-logistika potensialını dünyaya nümayiş etdirir. 

Prezident İlham Əliyevin forum çərçivəsindəki iş qrafiki olduqca zəngin və məhsuldar olub. Dövlət başçısı qısa müddətdə 5-dən çox dövlət və hökumət başçısı, 3 beynəlxalq təşkilat rəhbəri ilə mühüm siyasi görüşlər keçirib. Prezident dünyanın ən böyük 10 şirkət və maliyyə institutunun rəhbərləri ilə görüşüb, həmçinin panel müzakirələrində, təqdimat tədbirlərində iştirak edib. Bu qədər çoxsaylı və yüksəksəviyyəli görüşlərin qısa müddətə sığdırılması Azərbaycan Prezidentinin fəaliyyətində yüksək dinamizmini və ölkənin milli maraqlarını bütün platformalarda qətiyyətlə qorumasını nümayiş etdirir.

Xüsusilə vurğulamaq lazımdır ki, görüşlərin əksəriyyəti qarşı tərəfin müraciəti əsasında baş tutub. Bu, Prezident İlham Əliyevin şəxsi nüfuzunun və beynəlxalq aləmdə "sözü imzası qədər keçərli olan lider" kimi tanınmasının nəticəsidir. Eyni zamanda Azərbaycanın Avropanın enerji təhlükəsizliyindəki rolu, Orta dəhliz layihəsindəki mərkəzi mövqeyi ilə bağlıdır. Prezidentin Davosda iş qrafikinin sıx olması dövlət maraqlarının maksimum səviyyədə müdafiəsindən xəbər verir. Qərb və Şərq arasında körpü rolu oynayan, Avropanın enerji təhlükəsizliyində həlledici tərəfdaş olan Azərbaycana marağın böyük olması təbiidir və bu, diplomatik müstəvidə Bakının mövqeyini gücləndirir. Prezident İlham Əliyevin Davosdakı fəaliyyəti iqtisadi diplomatiyanın ən uğurlu nümunələrindən biridir. Forum çərçivəsində aparılan müzakirələr Azərbaycanın sabit, etibarlı və gələcəyə hədəflənmiş tərəfdaş imicini möhkəmləndirir. 

Transmilli şirkətlərin rəhbərləri ilə Davosda keçirilən görüşlər, sadəcə, protokol xarakteri daşımır, bunlar birbaşa xarici investisiyaların real layihələrə çevrilməsi üçün təməl rolunu oynayır. Xüsusilə "BlackRock" və Azərbaycan Respublikası Dövlət Neft Fondu (ARDNF) arasında imzalanan niyyət protokolu ölkəyə milyardlarla dollar investisiya potensialı vədləri ilə diqqət çəkir. "BlackRock" şirkətinin rəhbəri Larri Fink ilə görüş və ARDNF ilə imzalanan niyyət protokolu, Azərbaycanın qlobal maliyyə elitasındakı yerini tamamilə yeni bir pilləyə daşıyır. "BlackRock", sadəcə, bir şirkət deyil, idarə etdiyi 10 trilyon dollardan çox aktivlə dünyanın ən böyük investisiya meneceridir. Belə bir nəhəngin Azərbaycanla rəsmi protokol imzalaması ölkəmizin investisiya mühitinin beynəlxalq standartlara cavab verdiyinin ən yüksək təsdiqidir. Bu əməkdaşlıq digər transmilli korporasiyalar və fondlar üçün "Azərbaycana gəlin" çağırışı edən yaşıl işıq rolunu oynayır. 

Nüfuzlu şirkətlərin (bərpaolunan enerji, texnologiya və sənaye nəhəngləri) rəhbərləri ilə birbaşa təmaslar, ölkəyə qeyri-neft sektorunda birbaşa xarici investisiyaların cəlb edilməsinə də xidmət edir. Prezidentin Davosda nümayiş etdirdiyi iqtisadi diplomatiya sayəsində Azərbaycan yüksək texnoloji həllərin tətbiq olunduğu, "yaşıl enerji"yə keçid edən və qlobal təchizat zəncirində mərkəzi yer tutan strateji tərəfdaş kimi tanınır. Ölkəmiz, sadəcə, enerji ixracatçısı kimi deyil, həm də "yaşıl enerji" və rəqəmsal iqtisadiyyat sahəsində regional mərkəz kimi dünyaya təqdim olunur. "Dell", "Microsoft" və ya "Cisco" kimi texnologiya nəhəngləriylə təmaslar ölkədə rəqəmsal ekosistemin qurulmasına və yerli kadrların ən müasir standartlara uyğun yetişməsinə xidmət edir. Qeyri-neft sektoruna yatırılan hər bir dollar Azərbaycanın karbohidrogen resurslarından asılılığını azaldır və iqtisadi dayanıqlılığı artırır. Davos bu investisiyaların "yol xəritəsi"nin cızıldığı əsas platformadır. Azərbaycanın ənənəvi neft-qaz ölkəsindən "yaşıl enerji" ixracatçısına çevrilməsi beynəlxalq müstəvidə ən çox müzakirə edilən mövzulardan biridir. "Masdar", "ACWA Power" və "Fortescue" kimi şirkətlərlə qurulan tərəfdaşlıq Azərbaycanı Xəzər dənizinin külək və günəş enerjisi potensialını Avropaya nəql edəcək əsas oyunçuya çevirir. Qara dənizin dibi ilə çəkiləcək elektrik kabeli və "Yaşıl Enerji Dəhlizi" layihəsi Azərbaycanın regiondakı geostrateji əhəmiyyətini yeni müstəviyə qaldırır. 

Davosda keçirilən önəmli siyasi görüşlər Azərbaycanın beynəlxalq münasibətlər sistemindəki çəkisini nümayiş etdirir. Ölkələrin reytinqi məhz bu cür yüksəksəviyyəli dialoqlarda formalaşır. Dünya liderlərinin Azərbaycan Prezidenti ilə aktual regional və qlobal məsələləri müzakirə etməsi rəsmi Bakının beynəlxalq arenada söz sahibi olduğunu təsdiqləyir. Belə platformalar Azərbaycanın post-münaqişə dövründəki bərpa işlərini və sülh gündəliyi haqqında həqiqətləri dünya ictimaiyyətinə birbaşa çatdırması üçün əvəzsizdir. İnvestorlar üçün ən mühüm faktor proqnozlaşdırıla bilən mühitdir. Azərbaycanın daxili siyasi sabitliyi və dövlət institutlarının çevik fəaliyyəti ölkəmizi regionun ən cəlbedici sərmayə mərkəzinə çevirməkdədir. 

Azərbaycan artıq münaqişə tərəfi yox, strateji fürsətlər təqdim edən bir ölkədir. Dövlətimizin siyasi nüfuzu iqtisadi uğurları şərtləndirir, iqtisadi güc isə öz növbəsində siyasi müstəqilliyi möhkəmləndirir. Bu sarsılmaz vəhdət Azərbaycanı müasir dünyada etibarlı tərəfdaş və qüdrətli dövlət kimi tanıdır. Hər bir dövlətin gücü onun səsinin nə qədər uzaqdan eşidilməsi ilə ölçülür. Davosdakı hər bir siyasi görüş Azərbaycanın beynəlxalq təşkilatlarda dəstəklənməsinə, yeni iqtisadi tərəfdaşlıqların yaranmasına və ölkənin milli maraqlarının qlobal səviyyədə qorunmasına xidmət edir. Heç şübhəsiz, bu mühüm görüşlər yaxın gələcəkdə ölkəyə yeni investisiya layihələri, güclü siyasi dəstək və beynəlxalq əməkdaşlıq formatları şəklində qayıdacaq.

İsmayıl QOCAYEV, 

"Azərbaycan"