Türkiyənin İğdır vilayətinin Milli Təhsil İdarəsinin rəhbəri Əziz Gün Ermənistanla sərhəddə yerləşən Oba kəndini ziyarət edərək yerli məktəbin şagird və müəllimləri ilə birlikdə erməni quldur dəstələrinin qurbanı olmuş dinc sakinlərin xatirəsini yad edib.
AZƏRTAC xəbər verir ki, ibtidai sinif şagirdləri və onların müəllimləri 1919-cu ildə ermənilər tərəfindən diri-diri sobalara atılan kəndlilərin kütləvi məzarlığının yerində ucaldılmış abidənin önünə toplaşıblar.
Tədbir iştirakçıları həmçinin, faciə qurbanlarının dəfn olunduğu yerli qəbiristanlığı da ziyarət edib, şəhidlərin ruhuna dualar oxuyublar.
Əziz Gün 1918–1919-cu illərdə baş vermiş faciəli hadisələrdən danışaraq bildirib ki, həmin dövrdə Şərqi Anadolunun müxtəlif bölgələrində erməni silahlı dəstələri vəhşiliklər törədiblər.
“Həmin illərdə təkcə İğdır ərazisində yüzlərlə günahsız insan qətlə yetirilmişdi. Hakmehmet kəndində ermənilər 83, Oba kəndində isə 90 dinc sakini öldürüblər. Gənc nəsil öz bölgəsinin tarixini yaxşı bilməli, uşaqlara, qocalara və qadınlara rəhm etməyən ermənilərin törətdikləri vəhşilikləri unutmamalıdır”, – deyə İqdırın Milli Təhsil İdarəsinin rəhbəri vurğulayıb.
O qeyd edib ki, erməni cinayətlərinin qurbanlarının xatirəsinə ucaldılmış abidə xalqın birliyini və həmrəyliyini simvolizə edir.
“Tarixdən dərs çıxarmaq vacibdir. Keçmişin acılarını unutmadan, gələcəyə ümidlə baxmaq, sülh və birlik içində yaşamaq lazımdır”, – deyə idarə rəhbəri vurğulayıb.
Əziz Gün məktəbliləri əcdadlarının xatirəsinə layiq olmağa, Türkiyənin inkişafına töhfə verməyə çağırıb.
