Bu ölkə Azərbaycan Ordusunun real hədəfinə çevrilə bilər
"Azərbaycan və Ermənistan arasındakı münaqişə sona çatandan sonra qarşı tərəf Avropadan məlum missiyanı bura dəvət edib, eyni zamanda səngərlərin qazılması, möhkəmləndirilməsi işləri aparır. Proses bu gün də davam edir. Ermənistan bunu Azərbaycan tərəfdən ola biləcək hücumun qarşısının alınması məqsədilə gördüyünü deyir. Təbliğatı da həmişə bu yöndə aparırlar".
Bu sözləri qəzetimizə açıqlamasında hərbi ekspert Tərlan Eyvazov deyib. O bildirib ki, Azərbaycanın 35 ildən bəri bu ölkə ilə olan münaqişəsi bizi tam şəkildə düşünməyə vadar edir: "Hər kəs bilir ki, onlar həmişə bu cür təbliğat apararaq, pərdələnməyə çalışırlar. Bəhanə gətirirlər ki, 44 günlük Vətən müharibəsində Ermənistan öz arsenalının böyük qismini - deyilənə görə 70 faizini itirdiyinə görə hazırda boş yerləri doldurmaqla məşğuldur. Əsasən Hindistan, Fransa və digər ölkələrdən silah alış-verişi də bu məqsədlərə xidmət edir. Ermənistan müdafiə nazirinin Hindistana səfəri də birinci deyil. Hindistan dövlətinin silah tədarük edən firmaları ilə ermənilərin danışıqları gedir. Bu yöndə bağlanan müqavilələrin müəyyən qismi yerinə yetirilib, digərləri də yerinə yetirilməkdədir. Hindistandan silahların İran və oradan da Ermənistana daşınması logistik cəhətdən daha asan başa gəlir".
T.Eyvazov qeyd edib ki, Avropa İttifaqı missiyasının müddətinin uzadılması da bu görüntünün diplomatik və informasiya tərəfini doldurmaq üçün lazımdır. Ekspert Ermənistan tərəfinin bu qədər canfəşanlığının, Amerika ilə müəyyən təmaslar qurmaq cəhdlərinin Azərbaycana hər hansı təhlükə yarada biləcəyini düşünmür: "Prezident İlham Əliyevin də qeyd etdiyi kimi, əgər belə bir təhlükə formalaşarsa, həmin istehkamlar, bazalar, möhkəmləndirilmiş sədlər, texnika və silah Azərbaycan Ordusunun real hədəfinə çevrilə biləcək. Beləliklə, onlar müharibədə olduğu kimi elə Ermənistan ərazisindəcə məhv ediləcəklər. Proseslərin bu yerə çatacağına inanmıram. Çünki çətin də olsa, təmaslar davam etdirilir, addım-addım irəliləyişə nail olunur".
Müharibənin heç bir dövlətə sərf etmədiyini deyən ekspert vurğulayıb ki, Azərbaycan-Ermənistan arasında münaqişənin alovlanması Cənubi Qafqazda olan ölkələrə, ümumilikdə bölgəyə yaxşı heç nə vəd etmir. Buna çalışanlar kənar qüvvələrdir, onlar regionda qarşıdurma yaratmağa çalışırlar. İstər Azərbaycanda olan hadisələr, istər Gürcüstanda seçkilərdə baş verənlər, istərsə də Ermənistanın Qərb tərəfindən maliyyə adı altında yönləndirilməsi və silahlandırılması bu günə qədər nəticə verməyib. Ona görə ki, Azərbaycanın bu yöndə siyasəti olduqca uyğun, düzgün və praqmatikdir. Bundan sonra da belə bir təhlükənin olması real görünmür.
Əsmər QARDAŞXANOVA,
"Azərbaycan"
jpg_1775472819.jpg)
