Rusiyanın cənubundakı Krasnodar bölgəsində Ukraynanın dron hücumu nəticəsində azı iki nəfər ölüb, səkkiz sakin yaralanıb.
AZƏRTAC Rusiya mediasına istinadla xəbər verir ki, Krasnodar vilayətinin qubernatoru Veniamin Kondratyev “Telegram” kanalındakı paylaşımında yazıb: “Tuapse liman şəhərində yaşayış binalarına edilən hücum nəticəsində iki uşaq ölüb, iki nəfər yaralanıb, yaralılara tibbi yardım göstərilir”.
Şəhərdə “Rosneft” enerji şirkətinə məxsus neft ixrac terminalı və neft emalı zavodu yerləşir.
Qubernator daha sonra Tuapsedə yaralananların sayının yeddiyə çatdığını bildirərək əlavə edib ki, Tuapsinsk rayonunda fövqəladə vəziyyət elan edilib və pilotsuz təyyarənin qalıqları 24 fərdi evə, altı yaşayış binasına, iki təhsil müəssisəsinə və bir musiqi məktəbinə ziyan vurub.
O, həmçinin bildirib ki, dron hücumları Soçi və Novorossiysk də daxil olmaqla, regionun digər sahil şəhərlərinə də təsir edib. PUA-ların qalıqları yerdəki mülki təyyarəyə dəydikdən sonra bir nəfər xəstəxanaya yerləşdirilib və baş verən yanğın tez bir zamanda söndürülüb.
Rusiya Müdafiə Nazirliyi açıqlamasında ölkənin Hava Hücumundan Müdafiə Qüvvələrinin Krasnodar da daxil olmaqla altı bölgədə, eləcə də Qara dəniz, Azov dənizi və Krım üzərində bir gecədə buraxılan 207 Ukrayna dronunu vurduğunu iddia edib.
Ukrayna hakimiyyəti bu iddialara münasibət bildirməsə də, ölkənin Hərbi Hava Qüvvələri hava hücumundan müdafiə qüvvələrinin Rusiya tərəfindən buraxılan 659 drondan 636-sını və 44 raketdən 31-ni vurduğunu bildirib.
