ABŞ Prezidenti Donald Tramp Fransa Prezidenti Emmanuel Makronun onun təşəbbüsü olan və BMT-yə alternativ kimi təqdim edilən “Sülh Şurası”na qoşulmaqdan imtina etməsinə sərt reaksiya verib. O, Fransanı şərablarına və şampanlarına 200 faiz həcmində gömrük rüsumu tətbiq edəcəyi ilə hədələyib.
AZƏRTAC xəbər verir ki, Davosda (İsveçrə) keçiriləcək Dünya İqtisadi Forumuna yola düşməzdən əvvəl Florida ştatında jurnalistlərin suallarını cavablandıran Donald Tramp əvvəlcə istehzalı şəkildə danışıb: “O, doğrudanmı bunu deyib? Heç kim Emmanuel Makronu istəmir, çünki o, çox tezliklə artıq hakimiyyətdə olmayacaq. Bu problem deyil”. Ardınca isə əlavə edib: “Əgər düşmən mövqe tutmaq istəsələr, onun şərab və şampanlarına 200 faizlik vergi qoyaram. O zaman qoşulacaq. Amma qoşulmaq məcburiyyətində deyil”.
Fransa Prezidentinin yaxın ətrafı isə “franceinfo”ya açıqlamasında bildirib ki, “xarici siyasətimizə təsir göstərmək üçün tarif hədələri qəbuledilməz və təsirsizdir”.
Bir gün əvvəl Emmanuel Makronun ətrafı AFP-yə bildirib ki, Fransa hazırkı mərhələdə “Sülh Şurası”na qoşulmaq dəvətinə müsbət cavab vermək niyyətində deyil. İlkin olaraq Qəzza zolağı üzrə sülh planı çərçivəsində vəd edilən bu struktur indi dünyadakı münaqişələrin həllinə yönəlmiş, BMT ilə rəqabət aparan bir mexanizm kimi təqdim olunur.
Fransanın xarici işlər naziri Jan-Noel Barro da ölkəsinin bu mərhələdə təşəbbüsə qoşula bilməyəcəyini bəyan edib. Almaniya hökuməti isə bu məsələ ilə bağlı tərəfdaşlarla “koordinasiyanın vacibliyini” vurğulayıb.
Donald Tramp, eyni zamanda, Avropa liderlərinin onun Qrenlandiyanı ələ keçirmək planına çox da uzun müddət müqavimət göstərməyəcəklərini iddia edib: “Biz onu əldə etməliyik”. ABŞ Prezidenti, həmçinin Rusiya Prezidenti Vladimir Putinin də “Sülh Şurası”na dəvət olunduğunu təsdiqləyib.
Ağ Ev dəvət olunan ölkələrin siyahısını açıqlamayıb. Bununla belə, bir sıra paytaxtlar liderlərinin dəvət aldıqlarını təsdiqləsələr də, bu təklifi qəbul edib-etməyəcəkləri barədə açıqlama verməyiblər.
Bu fonda Emmanuel Makron Donald Trampa göndərdiyi şəxsi mesajda Parisdə G7 sammitinin təşkili təklifini irəli sürüb. O, bu toplantı çərçivəsində, dörd ilə yaxındır davam edən Ukrayna müharibəsindən sonra ilk dəfə olaraq rusların da “kənar formatda” dəvət edilə biləcəyini qeyd edib. Makron, həmçinin ukraynalıların, Qrenlandiya ilə bağlı fikir ayrılıqlarını müzakirə etmək üçün danimarkalıların və suriyalıların da toplantıya dəvət olunmasını təklif edib.
Donald Tramp bu mesajı özünün “Truth Social” şəbəkəsində paylaşıb və Fransa Prezidentinin ətrafı onun həqiqiliyini təsdiqləyib. Beləliklə, Vaşinqton və Paris arasında gərginlik artdığı bir vaxtda, beynəlxalq diplomatiyada yeni və qeyri-müəyyən təşəbbüslər gündəmə gəlib.
