Masallıda Milli Qəhrəman Səfəralı Məmmədovun anım günü qeyd olunub
Masallıda Azərbaycanın ilk Milli qəhrəmanlarından Səfəralı Məmmədovun anım günü ilə əlaqədar məzarı və ailəsi ziyarət edilib. Ziyarət zamanı qəhrəmanın məzarı önünə gül dəstələri düzülüb, ruhuna dualar oxunub, xatirəsi ehtiramla yad olunub. Şəhidin ailəsini ziyarət edən rayon rəhbərliyi onların qayğı və problemləri ilə maraqlanıb.
Səfəralı Məmmədov sağ olsaydı, ömrünün 64-cü ilini yaşayardı. 1963-cü il oktyabrın 16-da Masallının Sərçüvar kəndində dünyaya göz açıb, tam orta təhsilini doğma kəndində alıb. 1981-1983-cü illərdə Minskdə hərbi xidmətdə olub. Əsgəri xidməti başa vurduqdan sonra Krasnodar şəhərinə gedərək milis sistemində işə düzəlib. Az müddətdə xüsusi bacarığı ilə seçilib. Xidmətinin ilk ilində iki dəfə mükafatlandırılıb. Səmərəli fəaliyyətini nəzərə alaraq 1988-ci ildə onu Bakı Xüsusi Orta Milis Məktəbinin (indiki Polis Akademiyası) qiyabi şöbəsində təhsil almağa göndəriblər. 1990-cı ildə məktəbi bitirən Səfəralı xidmətini vətəndə davam etdirmək qərarına gəlib. Bakıda hava limanında iş təklif etsələr də, Ağdam RDİŞ-də xidmət etməyə üstünlük verib. Çox keçmir, polis tağım komandiri kimi döyüşə atılır. Rus dilini səlis bilməsi və sarışın olması kəşfiyyatçı kimi karına gəlib. Rus zabiti görkəmində tez-tez ermənilərin arasına gedərək Fərruxda, Ağbulaq fermasında, Qarakənddə neçə-neçə ermənini əsir götürüb.
1992-ci il fevralın 16-da igid polis Səfəralı Məmmədovun son döyüşü oldu. Xocavəndin Qaradağlı kəndində erməni cəlladları insanları vəhşicəsinə qətlə yetirib silos quyularına atmışdılar. Səfəralının başçılıq etdiyi dəstə erməni yaraqlılarını biçərək irəliləyirdi. Qeyri-bərabər döyüş olsa da, kiçik dəstə rus silahları ilə təpədən-dırnağa kimi silahlanmış çoxlu sayda erməni terrorçularını və hərbi texnikasını məhv etdi. Lakin düşmənlər Səfəralının idarə etdiyi maşını qumbaraatanla vurdular. Qəlpələrdən bir neçəsi gənc komandirin kəmərindəki əl qumbarasına dəydi. 28 yaşlı igid polis mayoru Səfəralı Qurban oğlu Məmmədov və dəstənin əksər üzvləri faciəvi şəkildə şəhid oldular. 6 iyun 1992-ci ildə ona Azərbaycan Respublikasının Milli Qəhrəmanı (ölümündən sonra) adı verildi.
Səfəralı ailə qurmamışdı. Öz xoşbəxtliyi haqqında fikirləşməyə macalı olmamışdı. Amma indi ruhu şaddır. Çünki uğrunda döyüşdüyü torpaqlarda bayrağımız dalğalanır. Masallı şəhərindəki küçələrdən biri və doğma kənddəki vaxtilə təhsil aldığı məktəb adını daşıyır. Məktəbin qarşısında isə büstü qoyulub. Haqqında "Qəhrəman polis" sənədli filmi çəkilib. Adı qəlblərdə yaşayanlardan, xatirəsi əziz tutulanlardandır. Bir evdə dünyaya göz açdı, böyüdü, bir xalqın qəhrəmanı, bir ölkənin qüruru oldu.
Hər il olduğu kimi, bu il də anım günündə bu qədirbilənlikdən, bu məhəbbətdən kövrəlmişdi qoca anası Şahdəstə xanım...
Seyran CAVADOV,
"Azərbaycan"
