Hərbi Qənimətlər Parkı... Qırx dörd gün davam edən Vətən müharibəsində düşmən üzərində çalınan möhtəşəm qələbənin əbədiyaşarlıq simvolu. Azərbaycan əsgərinin gücünü, qüdrətini simvolizə edən qəhrəmanlıq abidəsi. Ermənistan dövlətinin və ordusunun miskin durumunu əks etdirən muzey... 
Burada nümayiş olunan "eksponatlar" səyahətçidə ilk növbədə Qarabağ uğrunda gedən qanlı döyüşlər, Azərbaycan əsgərinin Vətən sevgisi, döyüş rəşadəti haqqında təəssürat yaradır. İstər-istəməz milyonlarla manat dəyəri olan bu hərbi texnikanın, silah-sursatın haradan alındığı, Qarabağa necə gəlib çıxması suallar yaradır.
Azərbaycan Prezidenti, Müzəffər Ali Baş Komandan İlham Əliyevin sərəncamına əsasən yaradılan Hərbi Qənimətlər Parkına daxil olan zaman insan özünü gerçək bir müharibə alanında, əsl döyüş zonasında hiss edir.
Bu parkda nələr yoxdur?
Ermənistan ordusuna məxsus sıradan çıxarılmış 150-dək ağır texnika, 57 zirehli texnika, "T-72" tankları, piyadaların döyüş maşınları, 30 artilleriya silahı (o cümlədən haubitsalar, "Toçka-U", "Smerç" və "İsgəndər-M" raketlərinin qalıqları), 49 avtomobil, 2 S1 "Qvozdika" özüyeriyən artilleriya qurğusu, "Osa" zenit-raket kompleksi və digər eksponatlar nümayiş etdirilir.
Eləcə də KUB zenit-raket kompleksi, hərəsindən bir nümunə olmaqla saz vəziyyətdə tırtıllı ağır texnikanı da burada görmək olur. Bir sözlə, 5 hektarlıq ərazidə düşməndən qənimət götürülən 300 eksponat nümayiş olunur. 
Parkda Ermənistanın 30 il torpaqlarımızda qurub-yaratdıqları istehkamların oxşarı, müdafiə mövqelərinin real mənzərəsi canlandırılır. Xüsusi yaradılmış pavilyonda bunkerlər, atəş nöqtələri, saxlanclar, tunellər, sığınacaqlar, səngərlər ilə tanış olmaq mümkündür. Parkda düşmən bölmələrinin döyüş mövqelərində xidmət və məişət şəraiti, əsgər yataqxanası da olduğu kimi qurulub. 
Səyahətçiləri ermənilərin məhv edilmiş hərbi yük maşınlarının nömrələrindən hazırlanmış, üzərində "Qarabağ Azərbaycandır!" yazılmış lövhə qarşılayır. Ən maraqlısı da budur ki, parkda nə varsa, 44 günlük Vətən müharibəsi zamanı Ermənistan ordusundan əldə edilmiş qənimətlərdən hazırlanıb. Mərmi yeşiklərindən hazırlanan oturacaqlardan, artilleriya gilizlərindən düzəldilmiş işıq dirəklərinə və zibil qutularına kimi... 
 Xatırladaq ki, müharibədə zəfər qazanmış bir çox ölkədə - Koreya, Fransa, Britaniya, Portuqaliyada hərbi qənimətlər parkı və hərb tarixi muzeyi yaradılıb.
 Cənubi Qafqazda erməni faşizmini məhv edib qazandığı böyük qələbə ilə regiona sabitlik gətirən Azərbaycanın Vətən müharibəsindəki böyük Zəfərini əbədiləşdirmək məqsədilə yaradılan Hərbi Qənimətlər Parkının çox böyük simvolik mənası var. Bu park başqalarının torpağına göz dikənlərin, mənəm-mənəmlik iddiasında olanların son aqibətini göstərən əyani vasitədir. Onu da qeyd edək ki, parkın ərazisində hərbi çadırda qurulan "Videozal" otağında Vətən müharibəsinə aid videoçarxlar və qısametrajlı filmləri izləmək mümkündür. Bununla yanaşı, parkın ərazisində informasiya mərkəzi, suvenir mərkəzi, kafe də fəaliyyət göstərir.
Hərbi Qənimətlər Parkı bir zamanlar tanklarını Bakıya sürəcəkləri ilə bizi təhdid edənlərə, "böyük Ermənistan" xəyalına düşənlərə tarixin ironiyasıdır. Ermənistan dövlətinin, ordusunun real vəziyyətini əks etdirən bir tablodur. Bir zamanlar başqalarının hesabına torpaqlarımızı işğal edib xalqımıza müsibətlər yaşadanlar indi cildlərini dəyişib Qərb ölkələrindən "təhlükəsizlik"lərinə təminat dilənirlər. 

Elşən QƏNİYEV,
"Azərbaycan"