Hamıya məlumdur ki, çoxmərtəbəli binalarda liftlər olmadan yaşamaq çətindir. "Akkord" şirkətinin Yeni Yasamal yaşayış massivi Əsəd Əhmədov 18 ünvanında inşa etdiyi "Sever" adlanan binada liftlərin böyük əksəriyyətinin artıq sıradan çıxması sakinlərdə ciddi narazılıq yaradıb.
Uzun müddətdir ki, binanın yük lifti işləmir. Halbuki hər mənzildən kommunaldan əlavə son 1-2 ayda 50, 20 və 10 manat liftin təmiri üçün pul yığılıb. Yığılan vəsaitin əvəzində iki sərnişin lifti təmir olunub. Yük liftinin təmiri üçün isə yenə pul toplanmağa başlanılıb.
Çoxmənzilli binada sakinlərdən hər ay kommunal ödənişlər alınır və bu vəsaitin bir hissəsi cari təmir işləri üçün nəzərdə tutulur. Onların sırasında liftlərin də təmiri var. Əslində isə olan vəziyyət tam fərqlidir. Yaşadığımız bina istifadəyə veriləndən bəri binanın fasadında heç bir təmir işləri görülmədiyindən küləkli və yağışlı havalarda suvaqlar qopub tökülür. Bu da sakinləri, yoldan keçənləri təhlükə ilə üz-üzə qoyur. Liftlərin təmiri isə mənzil sahiblərindən alınan əlavə vəsaitlər hesabına aparılır ki, bu da sakinlər arasında haqlı narazılıq yaradır.
Buna görə də bina təsərrüfatını idarə edən tərəfin bu xərcləri əvvəlcədən nəzərə alması vacibdir. Məntiqlə belə də olmalıdır. Təəssüf ki, bəzən məntiqlə qanunlar, yazılmış qaydalar tərs mütənasib olur. Necə ki, bizim liftimiz bu tərs mütənasibin fəsadını yaşayır.
MTK qayda-qanunlardakı boşluqdan istifadə edərək ciblərini doldurur, aidiyyəti qurumlar isə məsələyə biganə yanaşırlar. Biz deməkdən, yazmaqdan yorulduq, "Akkord" eşitməkdən yorulmadı. Ona görə də son ümid olaraq sizin qəzetə müraciət etmək qərarına gəldik. Xahiş edirik səsimizi əlaqədar təşkilatlara çatdırasınız.
Rahib QULİYEV,
Əsəd Əhmədov küçəsi, 18 saylı binanın sakini
