Həqiqətləri beynəlxalq ictimaiyyətə sürətli və intensiv şəkildə çatdırmaq lazımdır
Regionda vəziyyətin gərgin olduğu bir vaxtda Ermənistan Azərbaycana qarşı yenidən dezinformasiya kampaniyasına başlayıb. Hər fürsətdə ölkəmiz əleyhinə böhtan, qarayaxma kampaniyaları təşkil edən ermənilər və ermənipərəst dairələr Azərbaycanı gözdən salmağa, dost ölkələrlə arasını vurmağa və beynəlxalq ictimaiyyəti çaşdırmağa çalışırlar. Hazırda davam edən hibrid təhdidlərin də əsas məqsədi budur.
Milli Məclisin deputatı Elman Nəsirov "Azərbaycan" qəzetinə açıqlamasında bildirib ki, haqlı olaraq XXI əsri informasiya əsri adlandırırlar. İnformasiya əsri həm də informasiya müharibəsi anlamında qarşılanır: "İnformasiya müharibəsinin bütün müasir silahları var. İnformasiya müharibəsində gözləmə mövqeyində dayanmaq, müşahidəçi statusu daşımaq məğlubiyyətə aparan yoldur. Ona görə də informasiya savaşında öncül mövqedə dayanmaq və həqiqətləri beynəlxalq ictimaiyyətə sürətli və intensiv şəkildə çatdırmaq lazımdır. İnformasiya müharibəsinin mühüm tərkib hissələrindən biri də dezinformasiyadır. Azərbaycana münasibətdə bunun hər zaman şahidi oluruq. Ermənistan, dünyadakı ermənipərəst dairələr, erməni lobbisi və diasporu, onların nəzarətində olan müəyyən qüvvələr, qruplaşmalar ölkəmizə qarşı tez-tez belə dezinformasiya savaşı aparır, təhrif olunmuş məlumatlar yayırlar. Bu baxımdan Milli Məclisin Xarici müdaxilələrə və hibrid təhdidlərə qarşı müvəqqəti komissiyasının qeyd edilən hadisələrlə bağlı son açıqlaması diqqət çəkir. Faktlarla, dəqiq ünvanlarla göstərilir ki, bu gün Ermənistan tərəfindən Azərbaycana qarşı yenidən dezinformasiya savaşı başlanılıb".
Deputat qeyd edib ki, xüsusilə bölgəmizdə baş verən son proseslər fonunda bu məsələ diqqətdən yayınmır. İsrail-İran arasında qarşıdurma fonunda Azərbaycana qarşı saxta xəbərlər tirajlanır və bu, qəbuledilməzdir. Azərbaycan dövləti və ictimaiyyəti də haqlı olaraq buna öz etirazını bildirir. Bu prosesdə fəal olmalı, haqq səsimizi ucaltmalıyıq. Elə şərhlər, dezinformasiyalar, saxta məlumatlar yayılır ki, bununla həm Azərbaycanla İran, həm də Azərbaycanla İsrail münasibətlərinə xələl gətirmək hədəflənir. Müəyyən qüvvələr cidd-cəhdlə Azərbaycanı bu prosesdə tərəfə çevirməyə çalışırlar. Bu isə qeyri-mümkündür. Azərbaycan dövlətinin mövqeyi bəllidir, Xarici İşlər Nazirliyi İsrail-İran qarşıdurması ilə bağlı dövlətimizin rəsmi mövqeyini bəyan edib. Biz münaqişənin dinc, diplomatik yollarla, danışıqlar masası arxasında həlli ideyasını müdafiə edirik. Eyni zamanda Azərbaycanın mövqeyi odur ki, mülki insanlar və mülki obyektlər hədəf seçilməsin.
E.Nəsirov vurğulayıb ki, eskalasiyanın mümkün qədər qarşısının alınması və tezliklə qarşıdurma mühitinin aradan qaldırılması Azərbaycanın əsas istəyidir: "Hesab edirəm ki, Azərbaycan cəmiyyəti, həmçinin KİV bu prosesdə fəal olmalı, rəsmi dövlət mövqeyinə söykənən informasiyaları yaymalı və ölkəmiz əleyhinə aparılan qarayaxma kampaniyasına qarşı mübarizə aparmalıdır. Bu bir çox hallarda qabaqlıyıcı addımlarla müşahidə olunmalıdır".
Əsmər QARDAŞXANOVA,
"Azərbaycan"
