Milli Məclisin deputatlarından - Səməd Seyidov, Jalə Əliyeva və Sevinc Fətəliyevadan ibarət nümayəndə heyəti Meksikaya işgüzar səfər çərçivəsində bu ölkənin Deputatlar Palatasının sədri Kenia Lopes Rabadan ilə görüşüblər.
AZƏRTAC xəbər verir ki, görüşdə Meksika-Azərbaycan Dostluq Qrupunun yaradılmasının və onun fəaliyyətinin Azərbaycan tərəfindən yüksək qiymətləndirildiyi bildirilib. Parlament diplomatiyasının xalqlarımız arasında qarşılıqlı anlaşmanın möhkəmləndirilməsində, siyasi dialoqun tamamlanmasında və yeni əməkdaşlıq imkanlarının açılmasında mühüm rol oynadığı diqqətə çatdırılıb. Bu xüsusda, hər iki ölkənin səfirlərinin Azərbaycan-Meksika əlaqələrinin hərtərəfli inkişafına verdikləri töhfələr, eləcə də parlamentlərimizdə fəaliyyət göstərən dostluq qruplarının sədrlərinin münasibətlərimizin inkişafı, parlamentlərarası əlaqələrin möhkəmləndirilməsi və qanunverici orqanlarımız arasında daha sıx əməkdaşlığın təşviqi istiqamətində göstərdikləri səylər yüksək qiymətləndirilib.
Meksika Deputatlar Palatasının sədri və deputatları postmünaqişə dövründə ölkəmizin sülhün təmin olunması istiqamətində atdığı real addımlar, regionda formalaşmış sülh mühiti, 2025-ci ilin avqustunda Vaşinqtonda keçirilmiş görüşün əhəmiyyəti, dayanıqlı sülhün real məzmun kəsb etməsi, regional və beynəlxalq təhlükəsizlik məsələləri, eləcə də Cənubi Qafqazda yaranmış yeni reallıqlar və sülh gündəliyi barədə ətraflı məlumatlandırılıb. Deputatlar sülhün, qarşılıqlı etimadın və dialoqun təşviqində parlament diplomatiyasının rolunu xüsusi vurğulayaraq əməkdaşlığın daha da dərinləşdirilməsinin vacibliyini qeyd ediblər.
Azərbaycanın Meksikanı Latın Amerikasında mühüm tərəfdaşlarından biri hesab etdiyi, coğrafi uzaqlığa baxmayaraq suverenliyə hörmət, beynəlxalq hüququn aliliyi və xalqların öz gələcəyini sərbəst müəyyən etmək hüququ kimi ümumi prinsipləri bölüşdüyü vurğulanıb. Siyasi əlaqələrlə yanaşı, ticarət-iqtisadi, mədəniyyət, təhsil və enerji sahələrində də əməkdaşlığın genişləndirilməsi üçün böyük potensialın mövcud olduğu bildirilib. Meksikanın beynəlxalq məsələlərdə balanslı və konstruktiv mövqeyinin, eləcə də çoxtərəfliliyə sadiqliyinin yüksək qiymətləndirildiyi, bu yanaşmanın Azərbaycanın xarici siyasət prioritetləri ilə üst-üstə düşdüyü qeyd olunub.
Meksika Deputatlar Palatasının sədri səfərin iki ölkə arasında parlamentlərarası əlaqələrin inkişafı baxımından əhəmiyyət daşıdığını vurğulayaraq, yenicə təsis edilən Meksika-Azərbaycan Dostluq Qrupunun fəaliyyətinə uğurlar arzulayıb. O, Dostluq Qrupunun ikitərəfli əməkdaşlığın dərinləşdirilməsinə, qarşılıqlı anlaşmanın möhkəmləndirilməsinə və parlamentlər arasında dialoqun genişlənməsinə töhfə verəcəyinə əminliyini ifadə edib. Həmçinin sülhün əldə olunasının vacibliyindən söz açan sədr Azərbaycan və Ermənistan arasında münasibətlərin yeni mərhələsinin daha dayanıqlı və davamlı olacağına ümid etdiyini bildirib.
jpeg_1772961927.jpeg)
