Xalqımız Ulu Öndər Heydər Əliyevin anadan olmasının 103-cü ildönümünü böyük ehtiram, sonsuz sevgi və dərin minnətdarlıq hissi ilə qarşılayır. Aradan illər ötəcək, nəsillər dəyişəcək, lakin Heydər Əliyevə olan ümumxalq ehtiramı əbədi və tükənməz olacaq. Çünki Heydər Əliyev xalqımızı burulğanlardan xilas edən, müasir dövlətimizi quran, tarixin ən qüdrətli Azərbaycanının sarsılmaz və etibarlı təməllərini yaradan dahi və görkəmli şəxsiyyətdir.
Tarix sübut edir ki, məhz güclü lideri olan dövlətlər və xalqlar taleyin ən ağır sınaqlarından belə uğurla çıxaraq öz hədəflərinə inamla çata bilirlər. Bu, qədim zamanlarda belə olub, çağdaş dövrümüzdə də belədir. Siyasi quruluşundan və idarəetmə formasından asılı olmayaraq, istənilən dövlətin ziddiyyətlərlə dolu müasir münasibətlər sistemində uğur qazanmasında və xarici təzyiqlərə qarşı duruş gətirə bilməsində lider faktoru aparıcı rol oynayır.
Öz dövlətinin və xalqının taleyində böyük rol oynamış çoxsaylı liderlərin adını çəkmək olar. Bu sırada yeni dünya tarixinin ən mükəmməl nümunəsi xalqımızın Ümummilli Lideri Heydər Əliyevin Azərbaycan dövləti və dövlətçiliyi qarşısındakı xidmətləridir.
Heydər Əliyev Azərbaycanın rəhbəri olduğu bütün dövrlərdə xalqının taleyini sanki özünün taleyi kimi qəbul etmişdir. O, ən çətin, mürəkkəb və taleyüklü məqamlarda məsuliyyəti üzərinə götürərək Azərbaycanı böhranlardan çıxarmış, ölkəmizi ucaltmış, inkişaf, sabitlik və tərəqqi yoluna yönəltmişdir. Məsələn, Azərbaycanın müasir tarixində ilk dəfə sovet illərində yaşanan böyük iqtisadi yüksəliş Heydər Əliyevin xalqımızın qarşısındakı ən böyük xidmətlərindən biridir. Lakin o illərdə Ulu Öndər Azərbaycanı yalnız keçmiş ittifaqın ən qabaqcıl respublikaları sırasına yüksəltməklə kifayətlənmədi. Heydər Əliyev həm də Azərbaycanda elmin, təhsilin sürətli inkişafına nail oldu, idarəetmədə sovet beynəlmiləlçiliyi adı altında yerli xalqların hüquqlarını tapdalayan prinsiplərə yer verildiyi bir vaxtda məsul vəzifələrdə azərbaycanlı kadrların daha çox irəli çəkilməsini təmin etdi. Heydər Əliyev sovet ideologiyasının hakim olduğu bir reallıqda xalqımızın milli-mənəvi dəyərlərini qorudu, onların yaşadılması üçün bütün imkanlardan cəsarətlə istifadə etdi. Heydər Əliyev Azərbaycanın tarixindən, keçmişindən, milli dəyərlərindən yazan şair və yazıçıları qorudu, onlara qarşı repressiv tədbirlərin görülməsinə imkan vermədi.
Bir məsələni də xüsusi qeyd etməliyik ki, Heydər Əliyevin istər respublikamıza sovet dövrü rəhbərliyi illərində, istərsə də Kremldə çalışdığı illərdə ermənilərin Azərbaycana qarşı ərazi iddialarının baş qaldırmasına imkan verməmişdi. O illərdə Ermənistan rəhbərliyinin və erməni ziyalılarının Qarabağın Ermənistana birləşdirilməsi ilə bağlı Moskvaya ünvanladıqları bütün müraciətlər məhz Heydər Əliyevin qətiyyəti sayəsində nəticəsiz qalmışdı. Təəssüf ki, Heydər Əliyevin bu qətiyyətini və prinsipiallığını ötən əsrin 80-ci illərinin sonlarında respublikamıza rəhbərlik edənlər davam etdirə bilmədilər və Azərbaycan erməni separatizmi ilə üz-üzə qaldı.
Heydər Əliyev elə bir siyasi düha idi ki, hətta heç bir rəsmi vəzifə daşımadığı dövrdə belə öz xalqına xidmət edirdi. Bu mənada Ulu Öndərin 20 Yanvar faciəsindən sonra Moskvadakı Azərbaycan nümayəndəliyinə gəlişi və etdiyi cəsarətli çıxışı yalnız sovet rəhbərliyinə edilən etiraz deyildi. Bu çıxış həm də Azərbaycanda müstəqillik uğrunda milli hərəkatın yeni mərhələyə yüksəlməsinə yol açan siyasi manifest idi. Heydər Əliyevin siyasi fəaliyyətinin 1990-cı ilin payızından başlayan Naxçıvan dövrü isə Azərbaycan xalqının müstəqillik mücadiləsinin və müasir dövlətçilik tarixinin ən parlaq səhifələridir. 1990-cı ilin noyabrında Azərbaycan Xalq Cümhuriyyətinin üçrəngli bayrağının Naxçıvanda rəsmi bayraq kimi təsdiq olunması, «sovet» və «sosialist» sözlərindən imtina edilməsi, 1991-ci ilin fevralında isə SSRİ-nin saxlanılması ilə bağlı referendumun keçirilməsinin Naxçıvan MR-də boykot edilməsi sıradan hadisələr deyildi. Heydər Əliyev qətiyyətinin və cəsarətinin təcəssümü olan bu hadisələr milli müstəqillik mücadiləsinin daha dönməz və sarsılmaz olmasını təmin etdi.
Heydər Əliyevin 1993-cü ildə Bakıya gələrək Azərbaycanın müstəqilliyini xilas etməsi isə taleyin ona həvalə etdiyi növbəti tarixi missiya oldu. Ulu Öndərin 1992-ci ilin noyabr ayında Yeni Azərbaycan Partiyasının yaradılması ilə başlanan yeni siyasi missiyası müstəqilliyimizi xilas etdi, torpaqlarımızın işğal edilməsinə imkan vermədi. Öz əməlləri ilə xalqımızın Ümummilli Liderinə çevrilən Heydər Əliyev müasir Azərbaycan dövlətini yaratdı, müstəqil dövlətçiliyimizin siyasi və hüquqi əsaslarını formalaşdırdı. Heydər Əliyev Azərbaycanı yalnız bu günün deyil, gələcəyin dövləti kimi qurdu. Bu siyasətin nəticəsində Azərbaycan müasir çağırışları əsas götürən inkişaf yolu ilə getdi, beynəlxalq münasibətlər sistemində özünə layiqli yer tutdu. Ulu Öndər Heydər Əliyev xalqımızın milli həmrəyliyini təmin etdi, dövlətimizin ideoloji dayaqlarını formalaşdırdı, azərbaycançılıq ideyası siyasi-mənəvi məfkurəyə çevrildi.
Azərbaycan dövlətçiliyinin möhkəmləndirilməsində, milli müstəqilliyimizin qorunub saxlanılmasında və ölkəmizin hərtərəfli inkişaf yoluna çıxarılmasında müstəsna xidmətlər göstərmiş dahi şəxsiyyətin zəngin siyasi irsi bu gün də xalqımız üçün etibarlı yol xəritəsi kimi böyük əhəmiyyət daşıyır. Ulu Öndərin uzaqgörən siyasəti nəticəsində formalaşan güclü dövlətçilik ənənələri müasir Azərbaycanın uğurlu inkişafının əsasını təşkil edir və gələcək nəsillərə örnək olaraq yaşayır.
Heydər Əliyevin müəyyən etdiyi siyasi kurs Azərbaycanın uğurlarını təmin edən strateji xətt kimi Prezident İlham Əliyev tərəfindən davam etdirilir. Ötən 23 ilə yaxın müddət ərzində bu xətt Azərbaycanı uğurdan uğura aparıb. Təsadüfi deyil ki, hazırda beynəlxalq münasibətlər sistemində Azərbaycan deyəndə Cənubi Qafqazın lideri, sabitliyin möhkəm və sarsılmaz olduğu bir respublika, qlobal enerji təhlükəsizliyi məsələlərində söz sahibi olan bir dövlət göz önündə canlanır.
Ən əsası, bu gün dünyada Azərbaycanı müharibədə qalib gələn, ərazilərini döyüş yolu ilə işğaldan azad edən dövlət kimi tanıyırlar. Qeyd edək ki, Heydər Əliyevin ən böyük arzusu torpaqlarımızın işğaldan azad edilməsi, məcburi köçkünlərin doğma yurdlarına qayıdışı idi. Heydər Əliyev torpaqlarımızın işğaldan azad olunacağına əmin idi. Ulu Öndər 1990-cı illərdə çıxışlarının birində bununla bağlı demişdir: “Azərbaycan bu vəziyyətdən çıxacaq, Azərbaycanın ərazi bütövlüyü təmin olunacaq, qaçqınlar öz yerinə-yurduna, qayıdacaqlar və Azərbaycan müstəqil dövlət kimi yaşayacaq, inkişaf edəcəkdir”.
2020-ci ilin 44 günlük Vətən müharibəsində torpaqlarımızın işğaldan azad edilməsi, 2023-cü ildə isə Qarabağda erməni separatizminə son qoyulması Ulu Öndər Heydər Əliyevin ideyalarının reallığa çevrildiyini özündə əks etdirən ən möhtəşəm hadisələr oldu. Bu zəfərlər həm də bir vəsiyyətin, bir inamın və bir dövlətçilik fəlsəfəsinin həyata keçməsi idi. Bu gün işğaldan azad edilmiş torpaqlarda dalğalanan üçrəngli bayrağımız, Qarabağa və Şərqi Zəngəzura yola düşən qayıdış karvanları həm də Ulu Öndər Heydər Əliyevin həyata vəsiqə almasının ən möhtəşəm təcəssümləridir.
Ulu Öndərin ruhu rahatdır. Çünki artıq torpaqlarımız azaddır, artıq məcburi köçkünlər öz doğma yurdlarına geri qayıdırlar. Azərbaycan isə özünün inkişafı və uğurları ilə Ulu Öndərin arzuladığı bir səviyyəyə yüksəlib.
Nəsib MƏHƏMƏLİYEV,
Milli Məclisin deputatı
