Cənubi Qafqaz regionunda formalaşan postmüharibə reallıqları Azərbaycanı yeni dövrdə beynəlxalq birliyin aparıcı dövlətlərindən birinə çevirib. Artıq dövlətimizin bütün platformalar üzrə etibarlı tərəfdaş statusu daha da möhkəmlənib. Bu baxımdan dünyanın supergücü olan ABŞ-nin Azərbaycana marağı xüsusi olaraq artıb.
Milli Məclisin deputatı Müşfiq CƏFƏROV qəzetimizə açıqlamasında deyib ki, 2025-ci ildə Donald Trampın yenidən ABŞ Prezidenti seçilməsindən sonra münasibətlərin yeni mərhələyə qədəm qoyması üçün real perspektivlər formalaşıb: “Prezident İlham Əliyev və Prezident Donald Tramp arasında qarşılıqlı anlaşma və praqmatik əməkdaşlıq yanaşması iki ölkə arasında strateji tərəfdaşlığın möhkəmlənməsi üçün əlverişli zəmin yaradır. Enerji təhlükəsizliyi, regional sabitlik, iqtisadi əməkdaşlıq və terrorizmlə mübarizə sahələrində ortaq maraqlar, liderlər səviyyəsində aparılan dialoqlar iki ölkə arasındakı münasibətlərin inkişafını göstərir”.
Deputat qeyd edib ki, ötən il avqustun 8-də Vaşinqtonda əldə edilmiş razılaşmalar, imzalanmış sənədlər də dövlətimizin nüfuzunun göstəricisidir. Vaşinqton dünyanın iqtisadi-siyasi nəbzini formalaşdıran mühüm güc mərkəzlərindən biridir, nəhəng iqtisadiyyata, müqayisəyəgəlməz siyasi çəkiyə sahib olan bu dövlətin son proseslərdə Cənubi Qafqaza, xüsusilə, Azərbaycana diqqət yetirməsi bir çox mətləblərdən xəbər verir. ABŞ-nin Vitse-prezidenti Cey. Di. Vensin ölkəmizə səfəri də bu baxımdan xüsusi əhəmiyyətə malik idi.
M.Cəfərov vurğulayıb ki, Cənubi Qafqazda sülh Azərbaycanla ABŞ-nin ortaq marağındadır və iki dövlət arasında təhlükəsizlik sahəsində əməkdaşlıq, hər iki tərəf, eləcə də beynəlxalq və regional sülh və təhlükəsizliyə fayda verir. Bütün bunlar deməyə əsas verir ki, Azərbaycan-ABŞ münasibətlərində yeni, uğurlu səhifə açılıb.
Əsmər QARDAŞXANOVA,
“Azərbaycan”
