Vətən müharibəsi şəhidi Abdullazadə Həsənağa Şakir oğlunun anım günündə Hərbi Memorial Məzarlıqdakı (II Fəxri xiyaban) məzarı ailə üzvləri və yaxınları tərəfindən ziyarət edilib, məzarı önünə tər çiçəklər düzülüb və ruhuna dualar oxunub.
Həsənağa Abdullazadə 1993-cü il mart ayının 9-da Lənkəranda dünyaya gəlib, ilk təhsilini bu şəhərdə 9 saylı orta məktəbdə alııb. Deyilənə görə, Qarabağın işğal altında olması hələ yeniyetmə çağlarından onu çox düşündürür, məyus edirdi. Bu duyğularla da o, taleyini, bəxtini yurdun sabahına bağlayıb, ömrünü Vətənin müdafiəsinə həsr etməyə qərar verib. 2010-cu ildə C. Naxçıvanski adına Hərbi Liseyi, 2014-cü ildə Heydər Əliyev adına Ali Hərbi Məktəbi (leytenant rütbəsi ilə) bitirərək daha bir neçə hərbi kursda təhsilini, bilik və bacarığını təkmilləşdirib.
Baş leytenant Həsənağa Abdullazadə Murovdağda döyüşüb - Ömər aşırımında igidliklə vuruşub, lakin düşmən pusqusuna tuş gəlib, 2020-ci il oktyabrın 2-də şəhadətə qovuşub. Bir müddət itkin düşmüş hesab olunan şəhid Vətən oğlu yalnız 14 yanvar 2021-ci il tarixdə tapılıb və Bakıda, II Fəxri xiyabanda torpağa tapşırılıb. Prezident İlham Əliyevin müvafiq sərəncamları ilə “Kəlbəcərin azad edilməsinə görə”, “Vətən uğrunda” medalları və 3-cü dərəcəli “Rəşadət” ordeni ilə təltif edilib (ölümündən sonra).
Lənkəran Şəhər İcra Hakimiyyəti (ŞİH) tərəfindən şəhidin ailə üzvləri ilə əlaqə saxlanılıb, qayğı və problemləri ilə yaxından maraqlanılıb.
Şəhidin ailə üzvləri də onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.
Seyran CAVADOV,
“Azərbaycan”
jpg_1790976482.jpg)
