İyulun 17-də ADA Universitetində dövlət sifarişi əsasında maliyyələşən yerlər haqqında məlumat sessiyası keçirilib. Tədbirdə universitetin rəhbərliyi, müəllim heyəti, abituriyentlər və onların valideynləri iştirak ediblər.
AZƏRTAC xəbər verir ki, tədbirin məqsədi 2025–2026-cı tədris ili üçün dövlət sifarişi əsasında maliyyələşən yeni təhsil imkanlarını ictimaiyyətə təqdim etmək olub.
Tələbələr Dövlət İmtahan Mərkəzinin təşkil etdiyi qəbul imtahanları nəticəsində dövlət sifarişi ilə ayrılmış yerlərə qəbul olunacaqlar. Həmin tələbələr təhsil müddəti boyunca təhsil haqqından tam azad olunacaq və akademik göstəricilərinə uyğun olaraq aylıq təqaüd alacaqlar. Bu qərar ölkədə yüksəkixtisaslı mütəxəssislərin hazırlanmasına və ali təhsilin maliyyə baxımından daha əlçatan olmasına yönəlmiş strateji addım kimi qiymətləndirilir.
Tədbirdə çıxış edən ADA Universitetinin rektoru Hafiz Paşayev qeyd edib ki, bu təşəbbüs ali təhsilin keyfiyyətinə, gənclərin potensialının reallaşdırılmasına və ölkənin insan kapitalının inkişafına mühüm töhfə verəcək: “Yeni tədris ilindən etibarən ADA Universitetinə 180 dövlət sifarişli yer ayrılıb. Universitetin yaranmasından bəri əsas missiyamız Azərbaycanda xaricdə verilən təhsil səviyyəsindən də yüksək bir ali məktəb qurmaq olub”.
Tədbirdə, həmçinin ADA Universitetinin iqtisadiyyat ixtisasının məzunu Aydan Məmmədzadə və riyaziyyat ixtisasının tələbəsi Ömər Əsgərzadə çıxış edərək universitetdə qazandıqları təhsil təcrübələrini və uğur hekayələrini bölüşüblər.
Dövlət sifarişli yerlər ilkin mərhələdə müəyyən ixtisasları əhatə etsə də, gələcək illərdə bu imkanların daha çox akademik proqramlara şamil olunması planlaşdırılır. Bu isə daha geniş tələbə kütləsinin dövlət dəstəyindən yararlanmasına imkan yaradacaq.
2025–2026-cı tədris ili üzrə ADA Universitetində dövlət sifarişi əsasında tələbə qəbulu nəzərdə tutulan ixtisaslar bunlardır:
I ixtisas qrupu:
• Kompüter elmləri – 30 yer
• Kompüter mühəndisliyi – 30 yer
• Riyaziyyat – 30 yer
• İnformasiya texnologiyaları – 30 yer
II ixtisas qrupu:
• Maliyyə – 30 yer
• İqtisadiyyat – 30 yer
