Tramp Tehranla danışıqlarda "əhəmiyyətli irəliləyiş" olduğunu bildirib
ABŞ Pezidenti İranla razılığa gəlməkdə "əhəmiyyətli irəliləyiş" səbəbindən Hörmüz boğazından keçən gəmilərin müşayiətinin dayandırıldığını elan edib. Bu barədə Euronews telekanalı xəbər verir.
Məlumata əsasən, Amerika lideri Donald Tramp ABŞ tərəfindən həyata keçirilən Hörmüz boğazındakı gəmilərin müşayiəti əməliyyatının qısa müddətə dayandırılacağını açıqlayıb. O, bir neçə gün əvvəl başlayan "Azadlıq layihəsi"nin İranla razılığa gəlməkdə "əhəmiyyətli irəliləyiş" səbəbindən qarşılıqlı razılaşma ilə dayandırılacağını bildirib.
Sosial media paylaşımında Tramp bu qərarı ABŞ və İran arasında vasitəçi kimi çıxış edən Pakistanın xahişi ilə verdiyini vurğulayıb. Bununla belə, o, əlavə edibki, ABŞ-nin İran limanlarına qarşı blokadası qüvvədə qalacaq.
Daha əvvəl ABŞ dövlət katibi Marko Rubio əməliyyatın "məqsədlərinə çatdıqdan" sonra İranda ABŞ-İsrail hücumunun bitdiyini elan etmişdi.
Bu arada, İranın xarici işlər naziri Abbas Əraqçi çərşənbə günü Pekində çinli həmkarı Vanq Yi ilə görüşüb. Bu, müharibənin başlanğıcından bəri iranlı nazirin Çinə ilk səfəridir və Tehran bu ölkə ilə sıx iqtisadi və siyasi əlaqələr saxlayır.
Ağ Ev rəsmiləri Çini, Trampın ÇXR Sədri Si Cinpinlə Pekində keçiriləcək sammitdən əvvəl Hörmüz boğazını yenidən açmağa inandırmaq üçün İrana təsirindən istifadə etməyə çağırıb.
ABŞ-nin yüksək vəzifəli diplomatı bildirib ki, 28 fevralda ABŞ və İsrailin başladığı müharibə zamanı İranın boğazı faktiki olaraq bağlaması Pekin üçün Vaşinqtondan daha çox zərər vurub.
Pekinin ixrac yönümlü iqtisadiyyatı boğazdan keçən yüklərdən asılıdır. Baş Gömrük Administrasiyasının məlumatına görə, Çin həmçinin xam neftinin təxminən yarısını və mayeləşdirilmiş təbii qazının təxminən üçdə birini Yaxın Şərqdən idxal edir.
Dövlət katibi Marko Rubio bildirib ki, "İranın boğazı bağlamağı dayandırması Çinin maraqlarına uyğundur".FAYL - ABŞ Prezidenti Donald Tramp və Çin Prezidenti Si Cinpin 30 oktyabr 2025-ci il tarixində Cənubi Koreyanın Busan şəhərindəki Gimhae Beynəlxalq
Boğazın faktiki bağlanması bütövlükdə Asiyaya dərin təsir göstərir və Çin hökumətinin Pakistanla məsləhətləşmə səylərinə təsir edən və ikihəftəlik atəşkəsi asanlaşdıran məhz bu amil olub.
Tramp bildirib ki, Çinin İranı ötən ay əldə edilən kövrək atəşkəsə razılaşmağa təşviq etməsində rol oynadığına inanır.
Çinin pərdəarxası səyləri ilə tanış olan üç diplomat da təsdiqləyib ki, İranın ən böyük neft alıcısı olan Pekin danışıqların iflasa uğraması ərəfəsində göründüyü zaman Tehranı danışıqlar masasına geri qaytarmaq üçün öz təsirindən istifadə edib.
Lakin ABŞ administrasiyası inanır ki, Çin beynəlxalq gəmiçilik üçün vacib su yolunu yenidən açmaq üçün hələ də daha çox iş görə bilər.
Rizvan CƏFƏROV,
“Azərbaycan”
