20 Yanvar hadisələri Azərbaycan xalqının
tarixində ağır faciə olmaqla yanaşı, eyni zamanda milli iradənin, ləyaqətin və
azadlıq əzminin sarsılmazlığını nümayiş etdirən şanlı bir səhifədir. Qanlı
Yanvar sovet totalitar rejiminin xalqımıza qarşı törətdiyi ən amansız, insanlıq
əleyhinə əvvəlcədən planlaşdırılmış cinayətlərdən biri kimi tarixə düşmüşdür.
1987-ci ildən etibarən azərbaycanlıların
tarixi torpaqlarından kütləvi deportasiyası, Dağlıq Qarabağın Ermənistana birləşdirilməsi
cəhdləri fonunda Sovet rəhbərliyi problemi siyasi və hüquqi yollarla həll etmək
əvəzinə, silahsız dinc əhaliyə qarşı ağır hərbi texnika və müxtəlif növ
silahlardan istifadə etməklə kütləvi qırğın törətmişdir. 1990-cı il yanvarın
19-dan 20-nə keçən gecə Bakıya və respublikanın bir sıra bölgələrinə yeridilən
qoşun hissələri qadın, uşaq, qoca demədən günahsız insanları qətlə yetirmiş, Azərbaycan
xalqının azadlıq iradəsini qanla boğmağa cəhd göstərmişdir.
Nəticədə 147 nəfər şəhid olmuş, yüzlərlə insan
yaralanmış, yüzlərlə vətəndaş qanunsuz həbs edilmiş, dövlətə və şəxsi mülkiyyətə
külli miqdarda ziyan vurulmuşdur. Lakin bütün bu vəhşiliklər xalqımızın iradəsini
sındıra bilmədi. Əksinə, 20 Yanvar milli azadlıq hərəkatını daha da gücləndirdi
və Azərbaycan müstəqilliyinə aparan yolun dönüş nöqtəsinə çevrildi.
Bu faciəyə ilk siyasi-hüquqi qiyməti verən
Ümummilli Lider Heydər Əliyev olmuşdur. O, ən ağır və təhlükəli şəraitdə xalqın
yanında olduğunu nümayiş etdirərək, Sovet rəhbərliyinin cinayətkar mahiyyətini
açıq şəkildə ifşa etmiş, 20 Yanvar hadisəsini hüquqa, demokratiyaya və humanizmə
zidd olan tarixi cinayət kimi dəyərləndirmişdir. Məhz Ulu Öndərin qətiyyətli
mövqeyi sayəsində 1994-cü ildə Milli Məclis səviyyəsində bu faciəyə dövlət səviyyəsində
siyasi-hüquqi qiymət verilmişdir.
Bu gün möhtərəm Prezidentimiz cənab İlham
Əliyevin rəhbərliyi ilə 20 Yanvar şəhidlərinin xatirəsi dövlət səviyyəsində
daim uca tutulur. Şəhid ailələrinin və 20 Yanvar hadisələri ilə əlaqədar əlilliyi
olan şəxslərin sosial müdafiəsinin gücləndirilməsi, onlara mənzil, avtomobil, təqaüd
və digər sosial təminatların verilməsi dövlətin şəhidlərə və onların ailələrinə
olan yüksək ehtiramının bariz nümunəsidir. Hər il yanvarın 20-də ölkə üzrə bir
dəqiqəlik sükutla şəhidlərimizin xatirəsinin yad edilməsi, dövlət bayraqlarının
endirilməsi bu müqəddəs yaddaşın milli şüurda daim yaşadıldığını göstərir.
Bu gün tam əminliklə deyə bilərik ki, müstəqilliyimiz
və ərazi bütövlüyümüz uğrunda canlarından keçmiş bütün şəhidlərimizin ruhları
şaddır. Müzəffər Ali Baş Komandan, cənab Prezident İlham Əliyevin rəhbərliyi ilə
2020-ci ildə rəşadətli Azərbaycan Ordusu xalqımızın 30 illik həsrətinə son
qoyaraq torpaqlarımızı erməni işğalından azad etdi. 2023-cü ilin sentyabrında həyata
keçirilən uğurlu antiterror tədbirləri nəticəsində isə dövlət suverenliyimiz
tam şəkildə bərpa olundu.
Bu gün Azərbaycanın üçrəngli Bayrağı ölkəmizin
bütün ərazilərində qürurla dalğalanır. İşğaldan azad edilmiş torpaqlarda
genişmiqyaslı bərpa və quruculuq işləri sürətlə davam edir, Böyük Qayıdış
Proqramı uğurla icra olunur.
Azərbaycan xalqı öz tarixi yaddaşına sadiqdir.
Qanlı Yanvar faciəsi bizim milli kimliyimizi möhkəmləndirən, azadlıq və
suverenlik ideallarımızı daha da gücləndirən bir tarixdir. Bu irs gələcək nəsillərə
ötürüləcək və 20 Yanvar şəhidlərinin xatirəsi daim uca tutulacaqdır.
Fatma YILDIRIM,
“Azərbaycan”
