Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

Qeyri-neft sektorunun inkişafı Azərbaycanın bütün bölgələrini əhatə edir

23 Avgust 2017
lət başçısının Göygöl, Samux, Şəmkir, Gədəbəy rayonlarına səfəri zamanı bu, bir daha təsdiq olundu

 

Prezident İlham Əliyev bu günlər Göygöl, Samux, Şəmkir, Gədəbəy rayonlarında olmuş, bir sıra yeni müəssisə, avtomobil yolu, sosial obyektlərin açılışında iştirak etmiş, həmin bölgələrin sakinləri ilə görüşmüş, söhbət etmişdir. Azərbaycanın bütün bölgələrində gedən sosial-iqtisadi inkişaf bu rayonların timsalında da aydın görünür. Qazanılan nailiyyətlər göstərir ki, ölkənin regionlarının sosial-iqtisadi inkişafına yönəldilən dövlət proqramlarında qarşıya qoyulmuş vəzifələr hər yerdə ardıcıllıqla, müvəffəqiyyətlə yerinə yetirilir.
Qeyri-neft sektoru ölkə iqtisadiyyatında getdikcə özünə daha geniş yer alır. Ölkənin hər tərəfində çoxlu sayda yeni müəssisələr açılır ki, bu da həmin sektorun inkişafına böyük təkan verir. Dövlət başçısının sözügedən rayonlara səfəri zamanı açılan yeni müəssisələr bunun daha bir təsdiqidir. Göygöl rayonunda zona baytarlıq laboratoriyasının, Respublika Süni Mayalanma Mərkəzinin fəaliyyətə başlaması, Gədəbəydə limonad zavodunun, Şəmkirdə “Azərxalça” ASC-nin, “Şəmkir Aqroparkı”nın Logistika Mərkəzinin açılışı göstərir ki, qeyri-neft sektorunun özü də bir istiqamətdə deyil, çoxşaxəli şəkildə inkişaf edir.
Prezident Göygöl Zona Baytarlıq Laboratoriyasının əhəmiyyətini qeyd edərək demişdir: “Biz yeni yanaşma ilə kənd təsərrüfatında məhsuldarlığın artımına nail olacağıq. Çünki qarşımızda duran əsas vəzifə mövcud torpaq fondundan istifadə edərək məhsuldarlığı artırmaqdan ibarətdir. Buradakı toxumçuluq, baytarlıq, aqrokimya laboratoriyaları bu məqsədə çatmaq üçün bizə imkan yaradacaq. Çünki fermerlər, iş adamları, kəndlilər artıq biləcəklər ki, hansı toxumdan istifadə etmək lazımdır, hansı aqrotexniki tədbirlər görülməlidir, hansı torpaq sahəsində hansı gübrələrdən istifadə olunmalıdır”.
Göygöldə Respublika Süni Mayalanma Mərkəzinin fəaliyyətə başlaması da kənd təsərrüfatının, nəticə etibarilə isə qeyri-neft sektorunun inkişafına xidmət edir. Bu mərkəz ölkədə qaramalın çoxaldılması üçün damazlıq materialına olan tələbatı tam qarşılayacaq. Yerli heyvan cinslərindən istifadə olunmaqla yetişdirilmiş cinslərin də genetik imkanlarından faydalanmağa şərait yaranacaq.
Gədəbəy rayonunun Zəhmət kəndində limonad zavodunun istifadəyə verilməsi isə Azərbaycanın adi bir kəndində də müasir texnika və texnologiyaya əsaslanan müəssisənin tikilməsinin, hətta burada buraxılan məhsulun xaricə göndərilməsinin mümkün olduğunu göstərir.
Dövlət başçısının Şəmkirə səfəri çərçivəsində açılan yeni müəssisə rayon qadınlarıının böyük sevincinə səbəb olmuşdur. Belə ki, “Azərxalça”nın rayon filialında onlarca qadın öz məşğulluq problemini həll edəcək. İlk filialın Füzuli rayonunun Horadiz şəhərində açıldığını xatırladan Prezident İlham Əliyev bildirmişdir ki, orada 150 iş yeri yaradılmışdır. Növbəti Şəmkir filialında da hələlik bu qədər iş yeri var: “Burada işləyənlərin demək olar ki, hamısı qadınlardır. Bu xalça fabriklərinin yaradılması çox əlamətdar hadisədir. Bir müddət bundan əvvəl mənim sərəncamımla “Azərxalça” Açıq Səhmdar Cəmiyyəti yaradılmışdır. Cəmiyyətin qarşısında vəzifə qoyulmuşdur ki, tezliklə ölkəmizin bütün bölgələrində xalça fabrikləri yaradılsın... Beləliklə, Azərbaycanda xalça fabriklərinin sayı 30-a çatacaq. Bu fabriklərdə 5 mindən çox insan - onların mütləq əksəriyyəti qadınlar olacaq - daimi işlə təmin ediləcək”.
Yüzlərlə insanın məşğulluq probleminin həllinə imkan verən, ixrac potensialının artımına xidmət edən “Şəmkir Aqroparkı”nın Logistika Mərkəzi isə çoxsahəli bir kompleksdir.
Son günlərdə istər Şəmkirdə, istərsə də Prezidentin səfər etdiyi digər bölgələrdə bir neçə istiqamətdə çəkilmiş avtomobil yollarının açılışı olub. Məsələn, Şəmkir-Yeni Göyçə-Dağ Cəyir avtomobil yolu istifadəyə verilib. Bu yol 5 min nəfər əhalinin yaşadığı 7 kəndi birləşdirir.
Yol həm insanların rahatlığı, həm də iqtisadiyyatın inkişafının amillərindən biri deməkdir. Kəndin yolu varsa, deməli, orada alış-veriş etmək, dincəlmək, istirahət etmək istəyən də çox olacaq. Beləliklə, ticarət də, turizm də, digər sahələr də inkişaf edəcək.
Zazalı-”İmamzadə” kompleksi-Gəncə avtomobil yolunun, Samux-Füzuli-Lək-Əlibayramlı-Qarabağlar-Çobanabdallı-Samux avtomobil yolunun istifadəyə verilməsi də məhz bu inkişafdan xəbər verir.
Prezident İlham Əliyev ümumiyyətlə, Azərbaycanda həyata keçirilən yol layihələri barədə demişdir: “Bu il ölkəmizdə yüzlərlə kəndə yol çəkilir. Bu ümumi layihənin şərti adı “Qırx yol” layihəsidir. Bu, qırx layihədən ibarətdir, amma hər bir layihə bir neçə kəndi əhatə edir. Misal üçün, bir layihə 11 kəndi, digər layihə isə 5 kəndi əhatə edir. Yəni, “Qırx yol” layihəsi bir il ərzində yüzlərlə kəndi əhatə edir. Gələn il biz daha çox kəndi əhatə edəcəyik. Beləliklə, ölkəmizdə bir dənə də olsun təmirsiz kənd yolu qalmamalıdır. Magistral yolların layihələri, demək olar ki, başa çatır, şəhərlərarası yolların böyük hissəsi öz həllini tapıbdır. İndi kəndarası yollar da salınır. Yol infrastrukturuna görə Azərbaycan indi dünya miqyasında qabaqcıl yerdədir”.
Azərbaycanın bütün bölgələrində təkcə istehsal yönümlü deyil, çoxsaylı sosial obyektlər də istifadəyə verilir. Dünyanın çox yerlərində iqtisadi böhranın hələ də davam etdiyi bir zamanda Azərbaycan dövləti öz siyasətinin mərkəzində vətəndaşların dayandığı məqsədinə sadiq qalaraq məktəblərin, səhiyyə ocaqlarının, uşaq bağçalarının, elektrik stansiyalarının və s. tikintisini davam etdirir. Bir neçə gün ərzində Göygöldə və Samuxda körpələr evi-uşaq bağçalarının, Gədəbəydə Heydər Əliyev Mərkəzinin və içməli su təchizatı sisteminin, Şəmkirdə Mobil Səhra Cərrahiyyə Hospitalının və digər yeni obyektlərin istifadəyə verilməsi əhalinin bütün təbəqələrinə dövlətin qayğısının təzahürüdür.
Dövlət başçısının sözügedən bölgələrə səfəri çərçivəsində istifadəyə verilən Göygöl “Çiçəkli” Su Elektrik Stansiyası, Samux Aqroenerji Yaşayış Kompleksi, “Gədəbəy” elektrik yarımstansiyası isə indi rayon və kənd sakinlərinin işıq sarıdan heç bir korluq çəkmədiyini sübut edir. Bunlar və son 14 ildə tikilən onlarca elektrik stansiyaları və yarımstansiyaları, eyni zamanda başdan-başa nura boyanan Azərbaycanın rəmzləridir.

“Azərbaycan”