Stress orqanizmin təhlükəyə və ya yüksək gərginliyə verdiyi təbii reaksiyadır və qısamüddətli olduqda böyük risk daşımır. Lakin gərginlik xroniki formaya keçdikdə ürək-damar sisteminə ciddi zərər vuraraq ürək tutmasına (infarkta) yol aça bilər.
Rusiyalı tibb elmləri namizədi, kardioloq Yevgeni Kokin bildirib ki, kəskin stressdən sonra orqanizm normaya qayıdır. Lakin təşviş və gərginlik daimi fon rejiminə keçərsə, üstəlik buna tütün istifadəsi, yuxusuzluq, hərəkətsizlik və həddindən artıq yemək kimi amillər də qoşularsa, sağlamlıq üçün təhlükəli vəziyyət yaranır.
Mütəxəssis ciddi simptomları müvəqqəti yorğunluqla səhv salmamaqla bağlı xəbərdarlıq edir.
Aşağıdakı əlamətlər müşahidə olunduqda mütləq həkimə müraciət edilməlidir:
- Tez-tez təkrarlanan ürəkdöyünmə və ya ürək döyüntüsündə fasilələr;
- Təzyiqin yüksəlməsi və təngnəfəslik;
- Fiziki yüklənmələrə dözümlülüyün aşağı düşməsi;
- Sinədə diskomfort və ya ağrı.
Kardioloq vurğulayıb ki, sinədə qəfil güclü ağrı və ya sıxılma hissi, kəskin təngnəfəslik, soyuq tər, huşun itməsi və ya kəskin zəiflik zamanı “sadəcə stressdir” deyib gözləmək olmaz - bu halda təcili tibbi yardım çağırılmalıdır.
Ürəyi stressdən necə qorumalı?
Problemin profilaktikası üçün kardioloq sağlam həyat tərzinin əsas şərtlərini də açıqlayıb: müntəzəm idman etmək, zərərli vərdişlərdən (tütün və alkoqoldan) imtina etmək, kifayət qədər yatmaq və qan təzyiqini nəzarətdə saxlamaq vacibdir. Həmçinin xroniki stress və təşviş halını diqqətsiz qoymamaq, stresslə mübarizə texnikalarını öyrənmək və ehtiyac olduqda psixoloqa müraciət etmək məsləhət görülür.
Yasəmən MUSAYEVA,
“Azərbaycan”
jpg_1790976482.jpg)
