Xankəndidə mərhum şahmatçı, Avropa çempionu Vüqar Həşimovun xatirəsinə həsr olunan 11-ci Vüqar Həşimov Memorialının açılış mərasimi keçirilib.
AZƏRTAC xəbər verir ki, Konqres Mərkəzində təşkil olunan tədbir Dövlət Himninin səsləndirilməsi ilə başlayıb. Daha sonra Memorialın tarixi və coğrafiyası ilə bağlı videoçarx nümayiş etdirilib.
Azərbaycan Respublikası Prezidentinin Xankəndi şəhərində, Ağdərə və Xocalı rayonlarında xüsusi nümayəndəsinin müavini Səbuhi Qəhrəmanov öz çıxışında Vüqar Həşimovun ölkə şahmatı tarixindəki rolundan bəhs edib. O bildirib ki, Memorial təkcə anım tədbiri deyil, həm də mərhum qrosmeysterin xatirəsinə dərin hörmət əlamətidir. S. Qəhrəmanov Xankəndi işğaldan azad olunduqdan sonra bir çox yerli və beynəlxalq yarışa yüksək səviyyədə ev sahibliyi etdiyini vurğulayıb.
Azərbaycan Şahmat Federasiyasının prezidenti Mahir Məmmədov 10-cu Vüqar Həşimov Memorialının Şuşada keçirildiyini xatırladıb. O, turnirin təşkilinə göstərilən dəstəyə görə Prezident İlham Əliyevə dərin təşəkkürünü bildirib. Vüqar Həşimovun ölkə şahmatına verdiyi töhfələrdən söz açan Beynəlxalq Şahmat Federasiyasının vitse-prezidenti onun uğurlarının gənc iti zəka sahibləri üçün motivasiya mənbəyi olduğunu deyib. O, dünyaşöhrətli şahmatçıların bu turnirə hər zaman həvəslə qatıldığını vurğulayıb. M. Məmmədov yarışın yüksək səviyyədə və ədalətli keçəcəyinə inamını ifadə edib.
Federasiya rəhbəri sonda bu il Azərbaycanda bütün şahmat yarışlarının qalibi olan Rauf Məmmədovu təbrik edib.
Sonra Vüqar Həşimovun atası, Memorialın Təşkilat Komitəsinin sabiq sədri, bu ilin yanvar ayında faciəvi hadisə nəticəsində vəfat edən Qasım Həşimovun xatirəsi bir dəqiqəlik sükutla yad edilib.
Vüqar Həşimov Memorialının Təşkilat Komitəsinin hazırkı sədri Sərxan Həşimov yarışın bundan sonra da keçiriləcəyinə söz verib. O bildirib ki, turnirin Xankəndidə təşkili tarixi hadisədir. S.Həşimov daha sonra yarışı açıq elan edib.
Memorialın baş hakim Rauf Hacılı isə iştirakçılara və qonaqlara yarışın reqlamenti haqqında məlumat verib. Onun sözlərinə görə, turnir rapid və blits yarışlarından ibarət olacaq. Hər iki yarış iki dövrə üzrə keçiriləcək, qalib ümumi xalların cəminə əsasən müəyyənləşəcək.
Vüqar Həşimov Şahmat Fondu, Gənclər və İdman Nazirliyi, eləcə də Azərbaycan Şahmat Federasiyasının təşkilatçılığı ilə keçirilən turnirdə 6 şahmatçı rapid və blits yarışlarında mübarizə aparacaq.
Zəka sahiblərindən Yan Nepomnyaşi (FIDE), Amin Tabatabai (İran), Vladimir Fedoseyev (Sloveniya), Nodirbek Yakubboyev (Özbəkistan), Rauf Məmmədov və Aydın Süleymanlı 2 dövrədə qüvvələrini sınayacaqlar.
Turnirə dekabrın 11-də yekun vurulacaq.
Qeyd edək ki, Vüqar Həşimov memorialı ilk dəfə 2014-cü ildə keçirilib. 2023-cü ildən isə turnir FIDE dünya çempionatının seçmə mərhələ statusunu alıb.
jpg_1765410473.jpg)
