Zəngəzur Dəhlizinin işə salınması istiqamətində atılan addımlar Türkiyənin sərhəd əyalətlərinin sakinləri arasında Şərqi Anadolunun inkişafına artan investisiya qoyuluşu ilə bağlı gözləntiləri artırıb.
AZƏRTAC xəbər verir ki, bu barədə “Türkiyə” nəşri Naxçıvanda keçirilən 2-ci Azərbaycan-Türkiyə Regional İqtisadi Forumunun nəticələrini şərh edərək yazır. Forumda digərləri ilə yanaşı Ardahan, Qars və İğdır əyalətlərindən qeyri-hökumət təşkilatlarının və biznes ictimaiyyətinin nümayəndələri də iştirak edib.
Nəşr ekspertlərin Zəngəzur Dəhlizinin açılışının bölgədə ticarət həcmini 50 milyard dollara çatdıracağına dair proqnozlarına diqqət çəkib.
Qeyd olunur ki, Türkiyənin sərhəd əyalətlərinin vali administrasiyaları proqnozlaşdırılan ehtiyacları ödəmək üçün nəqliyyat infrastrukturunun və sənaye zonalarının inkişafını fəal şəkildə təşviq edir.
Azərbaycan Prezidentinin Naxçıvan Muxtar Respublikasındakı (NMR) səlahiyyətli nümayəndəsi Ceyhun Cəlilovun çıxışından fikirlər təqdim edilir. O, Zəngəzur Dəhlizinin bütün Türk dünyası üçün əhəmiyyətini qeyd edir. Ceyhun Cəlilov forum iştirakçılarını Naxçıvan Muxtar Respublikasının 2023-2027-ci illər üçün Sosial-iqtisadi İnkişafı üzrə Dövlət Proqramı kontekstində muxtar bölgənin inkişaf planları barədə məlumatlandırıb.
Prezident İlham Əliyev tərəfindən təsdiq edilmiş dövlət proqramının Naxçıvanın innovasiyalar, rəqabət qabiliyyəti və müasir infrastruktura əsaslanan iqtisadi modelə keçidinin əsasını təşkil etdiyi vurğulanır.
Məqalədə Azərbaycan Kiçik və Orta Biznesin İnkişafı Agentliyinin (KOBİA) rəhbəri Orxan Məmmədovun iki qardaş ölkə arasında iqtisadi əməkdaşlığın, o cümlədən kənd təsərrüfatı və turizm sahələrində əməkdaşlığın əhəmiyyətini vurğulayan çıxışına xüsusi diqqət yetirilir.
Bundan əlavə, Zəngəzur Dəhlizinin bütün region üçün əhəmiyyəti barədə bəyanatları dəstəkləyən Ardahan əyalətinin valisi Hayrettin Çiçək və Ardahan Ticarət və Sənaye Palatasının rəhbəri Çetin Dəmirçinin fikirləri də qeyd olunur.
