Səhiyyə naziri Teymur Musayev Qırğızıstanın paytaxtı Bişkek şəhərində keçirilən Türk Dövlətləri Təşkilatının səhiyyə nazirlərinin VI iclasında iştirak edib.
Səhiyyə Nazirliyindən AZƏRTAC-a verilən məlumata görə, görüşdə Qırğızıstan, Türkiyə, Qazaxıstan və Özbəkistanın səhiyyə nazirliklərinin rəhbərləri və nümayəndə heyətləri iştirak ediblər.
Tədbirin açılışında çıxış edən Qırğız Respublikasının səhiyyə naziri Damirbek Osmonov Türk Dövlətləri Təşkilatına üzv və müşahidəçi dövlətlər arasında səhiyyə sahəsində əməkdaşlığın daha da inkişaf etdirilməsinin vacibliyini vurğulayıb.
Tədbirdə çıxış edən səhiyyə naziri Teymur Musayev türk dövlətləri arasında səhiyyə sahəsində əməkdaşlığın daha da genişləndirilməsi, rəqəmsal həllərin tətbiqi və qarşılıqlı məlumat mübadiləsinin inkişaf etdirilməsinin əhəmiyyətini vurğulayıb. Teymur Musayev Azərbaycanın Səhiyyə Nazirliyi tərəfindən Türktransplant Vahid Məlumat Platformasının yaradılması təşəbbüsünün irəli sürüldüyünü bildirib.
Nazir Azərbaycanın səhiyyə sistemində rəqəmsal transformasiya istiqamətində həyata keçirilən tədbirlərdən danışaraq, cari ilin iyun ayında vətəndaşların sağlamlıq məlumatlarının beynəlxalq standartlara uyğun şəkildə toplanılmasını və fasiləsiz mübadiləsini təmin edən “Tibbi Rəqəmsal Əkiz Sistemi”nin təqdim olunduğunu diqqətə çatdırıb.
Səhiyyə naziri türk dövlətləri arasında vahid tibb-elmi məkanın yaradılması, birgə elmi tədqiqatların aparılması, tibb təhsili və elektron səhiyyə standartlarının müəyyənləşdirilməsi, eləcə də davamlı tibbi təhsilin təmin edilməsini əməkdaşlığın əsas istiqamətləri kimi qeyd edib.
İclas çərçivəsində nazirlər “Türk Dünyası Vizyonu – 2040” sənədi və TDT-nin 2022–2026-cı illər üzrə Strategiyası əsasında səhiyyə sahəsində əməkdaşlığın inkişaf etdirilməsinin vacibliyini vurğulayıblar. Tərəflər səhiyyə sistemlərinin dayanıqlığının gücləndirilməsi, əsas səhiyyə xidmətlərinin davamlılığının təmin edilməsi, yoluxucu xəstəliklərə, təbii fəlakətlərə və digər fövqəladə hallara effektiv cavab tədbirlərinin həyata keçirilməsi istiqamətində birgə fəaliyyətin əhəmiyyətini qeyd ediblər
Tədbirdə “TDT Səhiyyə Nazirlərinin 6-cı Toplantısının Birgə Bəyannaməsi” imzalanıb. Bəyannamədə dərman vasitələrinin təhlükəsizliyi və əlçatanlığı, tibbi kadrların peşəkarlıq səviyyəsinin artırılması, səhiyyədə süni intellektdən məsuliyyətli istifadə, əsas qeyri-infeksion xəstəliklərlə mübarizə, səhiyyə infrastrukturu və əczaçılıq sənayesinə investisiyaların təşviqi kimi istiqamətlər üzrə əməkdaşlığın gücləndirilməsi əksini tapıb.
Tərəflər, həmçinin Türktransplant təşəbbüsü çərçivəsində əməkdaşlığın davam etdirilməsi, ümumi tibbi turizm şəbəkəsinin inkişaf etdirilməsi, dərman vasitələri və tibbi avadanlıqların birgə satın alınması mexanizminin hazırlanması, TürkEMT təşəbbüsünün inkişaf etdirilməsi və səhiyyə sahəsində 2030-cu ilədək Dayanıqlı İnkişaf Məqsədlərinə nail olunmasına töhfə verilməsi barədə razılığa gəliblər.
İclas çərçivəsində Türk Dövlətləri Birliyinin Baş katibi Kubanıçbek Ömüralıyev, Qırğızıstanın səhiyyə naziri Damirbek Osmonov və Qazaxıstanın səhiyyə naziri Akmaral Alnazarova ilə ikitərəfli görüşlər keçirilib.
Səhiyyə nazirlərinin VII iclasının Türkiyədə keçirilməsi qərara alınıb.
Tədbir çərçivəsində Bişkekdəki Qırğız-Türk Dostluq Xəstəxanasına səfər təşkil edilib.
jpg_1790976482.jpg)
