Tələbə Qəbulu üzrə Dövlət Komissiyası (TQDK) iyulun 7-də 2015/2016-cı tədris ili üçün Azərbaycan Respublikasında baza ali tibb təhsili əsasında həkim-mütəxəssislərin hazırlanması məqsədilə rezidentura səviyyəsinə qəbul imtahanının ikinci mərhələsini keçirəcək.
TQDK-dan AZƏRTAC-a bildiriblər ki, imtahan Bakı şəhərində iki, Naxçıvan şəhərində bir binada saat 11:00-da başlanacaq və 2 saat 30 dəqiqə ərzində aparılacaq.
Namizədlərə iyunun 30-dan etibarən internet vasitəsilə “Namizədin imtahana buraxılış vərəqəsi” təqdim olunur.
İmtahanda iştirak üçün namizədlər aşağıdakı sənədləri mütləq təqdim etməlidirlər:
• “Namizədin imtahana buraxılış vərəqəsi”ni;
• şəxsiyyəti təsdiqləyən sənədin əslini.
Göstərilən sənədlərdən biri olmadıqda və ya sənədlər arasında uyğunsuzluq olduqda namizəd imtahana buraxılmayacaq.
İmtahanda namizədlərə ixtisas fənləri üzrə 100 test tapşırığı təqdim olunur və hər bir test tapşırığının düzgün cavabı bir balla qiymətləndirilir, səhv cavablar namizədin imtahan nəticəsinə təsir göstərmir.
Müsabiqə baza və ixtisas fənlərindən toplanılan balların cəminə əsasən aparılır. Müsabiqədə iştirak etmək üçün namizədin baza fənləri üzrə imtahanda topladığı test balı 30-dan, ixtisas fənləri üzrə isə 50-dən az olmamalıdır.
Rezidentura səviyyəsinə ərizə qəbulu internet vasitəsilə fevralın 16-dan 23-dək aparılıb və 1245 namizəd elektron ərizə doldurub təsdiqləyib. Onlardan 1001-i imtahanın birinci mərhələsində (martın 15-də) 30 və daha yüksək bal toplayaraq imtahanın ikinci mərhələsində iştirak hüququ qazanıb. İştirakçılardan 494 nəfəri cari ilin, 507 nəfəri isə əvvəlki illərin məzunudur. Onlardan 748 nəfəri qız, 253 nəfəri isə oğlandır. 852 namizəd Azərbaycan bölməsi, 149 namizəd isə rus bölməsi üzrə imtahan verəcək. Namizədlərdən 11-i xarici ölkə vətəndaşıdır. Bakı şəhərində 976, Naxçıvan şəhərində isə 25 namizədin imtahan verəcəyi nəzərdə tutulur.
İmtahanların idarə olunması üçün 16 imtahan rəhbəri, 112 zal nəzarətçisi ayrılıb.
Rezidenturaya qəbul olunmaq üçün ixtisas seçimi iyulun 10-dan 14-dək aparılacaq. Namizədlər müəyyənləşdirilmiş müddətdə elektron ərizələrinə daxil olaraq ali tibb təhsili istiqamətinə uyğun (bitirdiyi fakültəyə müvafiq) ixtisasları seçib təsdiqləməlidirlər.
Qeyd edək ki, Azərbaycan Tibb Universitetinin hərbi tibb fakültəsinin məzunları üçün rezidenturaya qəbul imtahanının birinci mərhələsi iyulun 6-da, ikinci mərhələsi isə iyulun 7-də keçiriləcək.
jpg_1765410473.jpg)
jpg_1765188547.jpg)
