Paris 2024-cü il Yay Olimpiya Oyunları ərəfəsində problemlərdən qurtula bilmir

Bu gün dünyada Fransa prezidenti Emmanuel Makrondan daha acınacaqlı vəziyyətdə olan insan tapmaq çətindir. O, apardığı səriştəsiz daxili və xarici siyasətə görə daim tənqidlərə və təhqirlərə məruz qalır, üstəlik Yay Olimpiya Oyunları ərəfəsində "Olimpiadaya hazırlıqla bağlı hər şey qaydasındadır", - deyərək daim çətin suallardan yayınmağa məcbur olur. İş o yerə çatıb ki, oyunların açılışının harada, dəqiq hansı məkanda keçiriləcəyi hələ də bəlli deyil. 
Təşkilat komitəsi və polis prefekturası, eləcə də təhlükəsizlik xidmətləri məşhur Paris barjalarının nümayəndə heyətləri ilə Sena boyunca təmtəraqlı keçidinin təhlükəsiz olduğuna qətiyyən əmin deyillər.
B ssenarisi - Eyfel qülləsindən çox uzaq olmayan və Sena çayına yaxınlıqda yerləşən Trokadero variantı da təhlükəsizliyə görə şübhələr doğurur. 
Fransa paytaxtının cinayətə ən çox meyilli şəhərətrafı ərazisi olan Sen-Denidə yerləşən "Stad de Frans" stadionunda açılış ssenarisi də var...
Təbii ki, oyunların keçirilməsinə məsul olan hər kəs bildirir ki, "hər şey yaxşıdır" və dünya bundan daha ideal, gözəl və təmtəraqlı bir şey görməyəcək.
Bununla belə, sağlam düşüncəli insanların buna bəzi şübhələri var. Məsələn, "Stad de Frans"a gəlincə, orada elə bir "təhlükəsizlik" var ki, siz maşınla gəlib, ən yaxşı halda velosipedlə qayıda bilərsiniz. Çünki avtomobiliniz qısa bir vaxtda oğurlana bilər. 
Trokaderoya gəlincə, bütün Fransa bilir ki, orada praktiki olaraq hər şeyi, o cümlədən qadağan olunmuş narkotik və psixotrop maddələri satışa çıxaran açıq hava supermarketi var. Parisin havasını sinəsinə çəkməyə gələn turistlərin orada, əksinə baş-beyinlərinin dumanlanması ehtimalı az deyil.
Bunlara xoşagəlməz hal kimi ölkənin bütün dünyanın diqqətini çəkdiyi anda tətillərin başlaması əlavə olunmalıdır.
Olimpiada müddətində məzuniyyətə çıxan polisləri işdə saxlamaq üçün onların həyat planlarında dəyişikliklərə görə kompensasiya kimi mükafatlar və bonuslar vəd olunduqdan sonra nəqliyyat işçiləri da maaşlarının artırılmasını tələb ediblər. Özü də yalnız yarışların keçiriləcəyi müddətdə yox, təqaüdə çıxana qədər.
İndi növbə zibil yığışdıranlarındır. Bir gün əvvəl məlum olub ki, əgər onlar daha çox əməkhaqqı və yaxşılaşdırılmış iş şəraiti əldə etməsələr, vaxtından əvvəl etiraz aksiyalarına başlayaraq Olimpiada boyu tətil edəcəklər. 
Beləliklə, Parisin havası həm də yığılmamış tullantıların qoxusunun yeni çalarlarını alacaq.

Rizvan CƏFƏROV,
"Azərbaycan"