İyulun 13-də IV Şuşa Qlobal Media Forumu çərçivəsində D-8 Media Mükəmməllik Mərkəzinin strategiyasının təqdimatı olub.
AZƏRTAC xəbər verir ki, təqdimatdan əvvəl çıxış edən Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Azərbaycanın D-8 ailəsinin tamhüquqlu üzvü olduğunu bildirib.
“Bu platforma qlobal iqtisadi əməkdaşlıq baxımından böyük əhəmiyyət daşıyır və biz təşkilatın fəaliyyətinə xüsusi önəm veririk. Prezident İlham Əliyev D-8 çərçivəsində Media Mükəmməllik Mərkəzinin, eləcə də Nəqliyyat və Enerji Mükəmməllik Mərkəzlərinin Azərbaycanda yaradılması təşəbbüsünü müsbət qarşılayıb. Bu gün artıq həmin təşəbbüsün ilk nəticələrini görürük”, - deyə Hikmət Hacıyev diqqətə çatdırıb.
Prezidentin köməkçisi vurğulayıb ki, D-8 Media Mükəmməllik Mərkəzi üzv ölkələr arasında media sahəsində əməkdaşlığın genişləndirilməsi baxımından mühüm platformadır.
D-8 Təşkilatının Baş katibi Sohail Mahmud bu təşəbbüsün formalaşmasına verdikləri töhfələrə görə bütün D-8 üzv ölkələrinə təşəkkürünü bildirib. O, D-8-in 1997-ci ildə yaradıldığı dövrlə müqayisədə dünyanın əsaslı şəkildə dəyişdiyini deyib: “Təkqütblülük artıq keçmişdə qalıb. Biz çoxqütblülüyə doğru güclü meylin şahidi oluruq. Belə bir şəraitdə iqtisadi əməkdaşlıq təşkilatı kimi D-8-in missiyası yeni əhəmiyyət qazanıb. Eyni zamanda, üzv dövlətlərin imkanları olduqca artıb”.
“Media Mükəmməllik Şəbəkəsi”nin baş direktoru Fuad Mərdiyev D-8 Media Mükəmməllik Mərkəzinin strategiyası ilə bağlı ətraflı məlumat verib. O diqqətə çatdırıb ki, D-8 Media Mükəmməllik Mərkəzinin əsas məqsədi üzv ölkələr arasında media sahəsində əməkdaşlığı gücləndirmək, peşəkar potensialın inkişafını, tədqiqat və innovasiyaları təşviq etmək, həmçinin media sahəsində vahid əməkdaşlıq platforması formalaşdırmaqdır.
Təqdimat zamanı Mərkəzin institusional inkişafı, beynəlxalq əməkdaşlığın genişləndirilməsi, üzv dövlətlər arasında koordinasiya mexanizmlərinin yaradılması, təcrübə mübadiləsi, media tədqiqatlarının aparılması və dezinformasiyaya qarşı mübarizə istiqamətində həyata keçirilməsi planlaşdırılan fəaliyyətlər barədə məlumatlar təqdim olunub.
Qeyd olunub ki, fəaliyyətin növbəti mərhələsində D-8 üzv dövlətlərinin media qurumlarını bir araya gətirən əməkdaşlıq şəbəkəsinin yaradılması, birgə layihələrin icrası, beynəlxalq təşkilatlarla tərəfdaşlığın genişləndirilməsi, habelə media sahəsində qabaqcıl təcrübələrin paylaşılması nəzərdə tutulur.
Tədbir siyasi şərhçi Ülviyyə Zülfiqarın moderatorluğu ilə keçirilib.
