Süni intellekt aqrar sektora da ayaq açır

Xaçmazda “Kənd təsərrüfatında süni intellektin tətbiqinə dair” layihə çərçivəsində növbəti “Bootcamp” keçirilib

Kənd təsərrüfatı sahəsində rəqəmsal texnologiyaların və innovativ yanaşmaların tətbiqini təşviq edən “Dəqiq kənd təsərrüfatında süni intellektin tətbiqi” layihəsi çərçivəsində Aqrar İnnovasiya Mərkəzinin təşkilatçılığı ilə növbəti “Bootcamp” həyata keçirilib.

“Bootcamp”ın əsas məqsədi gənc mütəxəssislərin bilik və bacarıqlarının artırılması, aqrar innovasiyaların praktik mühitdə öyrənilməsi, iri ixtisaslaşmış şirkətlər, akselerasiya və inkubasiya mərkəzləri, eləcə də tələbələr arasında təcrübə mübadiləsinin təmin olunmasıdır.

Xaçmaz rayonunda yerləşən “Food City Agrocomplex”in ərazisində təşkil olunan “Bootcamp”da “İnformasiya texnologiyaları”, “Aqronomluq”, “Elektronika”, “Qida elmləri”, “Kompüter mühəndisliyi” və “Data analitikası” ixtisaslarında təhsil alan tələbələr iştirak ediblər. İki gün davam edən tədbirə 20-yə yaxın ali təhsil müəssisəsindən 30 tələbə, həmçinin 10-dan çox akselerasiya və inkubasiya mərkəzinin mütəxəssisləri qatılıblar. İştirakçılar aqrar sahədə süni intellektin tətbiqi üzrə yerində təcrübə qazanmaq imkanı əldə ediblər.

“Bootcamp”ın rəsmi açılış mərasimində Xaçmaz Rayon İcra Hakimiyyəti başçısının müavini Anar Oruclu, Aqrar İnnovasiya Mərkəzinin direktoru Anar Cəfərov ,“Food City Agrocomplex”in baş icraçı direktoru Anar Ağayev və Biznesin İnkişafı Fondunun müşaviri Namiq Zeynalov çıxış edərək tələbələrə aqrar sahədə süni intellektin tətbiqi, rəqəmsal texnologiyaların üstünlükləri və sahənin gələcək inkişaf perspektivləri haqqında  məlumat veriblər. Çıxışlar zamanı aqrar təhsilin müasirləşdirilməsi, gənclərin bu sahəyə cəlb olunması və innovasiyaların bölgələrə inteqrasiyası kimi məsələlərə də toxunulub. Rəqəmsal transformasiyanın fermerlərin məhsuldarlığına, resurslara qənaətə və ixrac imkanlarına təsiri xüsusi vurğulanıb. Çıxışçılar gənclərin bu sahəyə marağının artırılmasının vacibliyini qeyd edərək onları innovasiya əsaslı layihələrdə daha fəal iştirak etməyə çağırıblar. Görüş zamanı tələbələrin gələcəkdə bu sahədə uğurlu karyera qurması üçün praktiki bilik və real layihələrdə iştirakının vacibliyi vurğulanıb.

Tədbir çərçivəsində akselerasiya və inkubasiya mərkəzlərinin, eləcə də ixtisaslaşmış aqrar şirkətlərin nümayəndələri tərəfindən praktik təqdimatlar və nümayişlər keçirilib. İştirakçılar “Şabran Aqroturizm Mərkəzi” innovativ təsərrüfatına, Meyvəçilik və Çayçılıq Elmi-Tədqiqat İnstitutuna, institutun “Ağıllı bağ” meyvəçilik sahəsinə, “Amoris” və “Firdevs” innovativ təsərrüfatlarına səfər ediblər. İnfoturlar zamanı təsərrüfatlarda tətbiq olunan rəqəmsal həllər, sensor texnologiyalar və süni intellekt alqoritmləri üzrə praktik məlumatlar təqdim olunub.

 “Bootcamp” iştirakçılarına eyni zamanda Xaçmazda keçirilən Aqrar Biznes Festivalında və Şaftalı Festivalında iştirak imkanı yaradılıb. Festival çərçivəsində tələbələr aqrar sahənin ekosistemi, yerli istehsal və regionun aqroturizm potensialı ilə yaxından tanış olublar. Tədbirin əsas məqsədi gənclər arasında kənd təsər-rüfatı sahəsinə marağın artırılması, süni intellekt və texnologiyaların aqrar sektorda tətbiqinin təşviqi, eləcə də bilik və bacarıqların real təsərrüfat mühitində möhkəmləndirilməsinə şərait yaratmaqdır.

A.ƏLİYEV,

“Azərbaycan”