"Xristian birliyi"nə çevrilən Avropa Parlamenti sifarişli qətnamələr qəbul edir
"Oktyabrın 24-də Avropa Parlamentinin Azərbaycana qarşı qəbul etdiyi qətnamə ikiüzlülüyün və riyakarlığın son həddidir. "Xristian birliyi" olan Avropa Parlamenti müsəlman ölkəsinin təəssübkeşliyini heç vaxt çəkməz. Ona görə də öz ərazilərinin suverenliyini təmin etmiş və müstəqil siyasət yürüdən Azərbaycan Avropa Parlamenti üçün lazım deyil".
Bu sözləri "Azərbaycan" qəzetinə Milli Məclisin deputatı Azər Badamov deyib. O bildirib ki, onlara əzilmiş, asılı vəziyyətdə olan Azərbaycan lazımdır ki, öz çirkin niyyətlərini reallaşdıra bilsinlər. Deputat bu baxımdan Avropa Parlamentinin qətnamələrini ikili standartların, sifarişlərin icrası və parlament tribunasının siyasi təzyiq üçün alətə çevrilməsinin göstəricisi hesab edir. AP-nin qəbul etdiyi qətnamə Azərbaycanda vəziyyət, insan və beynəlxalq hüquqların pozulması və Ermənistanla münasibətlər mövzusundadır. "Sual olunur ki, Azərbaycandakı vəziyyət Avropa Parlamentinə nə vaxtdan maraqlı olub? Əgər onlara ölkəmizdəki vəziyyət maraqlı olsaydı, torpaqlarımız işğal olunanda, bir milyona yaxın qaçqın və məcburi köçkün şəraitsiz çadır düşərgələrində yaşayanda, xalqımıza qarşı soyqırımları törədiləndə, dini-mədəni abidələrimiz, şəhər və kəndlərimiz dağıdılaraq talandıqda münasibət bildirərdilər. Biz 30 ildə Avropa Parlamentində bu məsələləri qaldırdıq və Ermənistana qarşı tədbirlərin görülməsinə çağırışlar etdik. Amma onlar heç nə baş verməmiş kimi bu məsələlərin üstündən səssiz keçdilər. İndi nə baş verib? Qərb Azərbaycanın öz ərazilərini işğaldan azad etməsini, Ermənistanın dağıtdığı yaşayış məntəqələrini bərpa edərək keçmiş məcburi köçkünlərin doğma yurdlarına qayıtmasını niyə həzm edə bilmir? Azərbaycan qeyri-adi bir iş görməyib. Ölkəmiz sadəcə BMT Təhlükəsizlik Şurasının qətnamələrini icra edib. Qəbul etdikləri qətnamədə beynəlxalq hüququn pozulmasından danışan avropalı parlamentarilər 30 ildə bir milyon azərbaycanlının pozulmuş hüquqlarını niyə görmədilər? O cümlədən Birinci Qarabağ müharibəsində itkin düşmüş 4 min azərbaycanlının hüquqlarından niyə danışmırlar? Həmin azərbaycanlıların bir hissəsi əsir götürülərək, Ermənistanda qul kimi işlədilərək işğəncələrə məruz qalanda niyə səslərini çıxarmırdılar? Mina terrorunun bu gün də davam etməsi, minalanmış ərazilərin dəqiq xəritələrinin verilməsi üçün Ermənistana niyə çağırış etmirlər?", - deyə o əlavə edib.
Deputat qeyd edib ki, Avropa Parlamentinin riyakarlığı o qədər böyükdür ki, Azərbaycana qarşı qətnamə qəbul edəndə hətta Avropa İttifaqının milli maraqları da nəzərə alınmır. Belə ki, Rusiyaya tətbiq etdiyi sanksiyaların bumeranq effekti ilə qarşılaşmasına baxmayaraq, Avropa Komissiyasına Azərbaycanla enerji sahəsində strateji tərəfdaşlıq haqqında 2022-ci ildə bağlanmış sazişə yenidən baxılmasını və ölkəmizdən qazın alınmasının dayandırılmasını istəyirlər. Bu gün Azərbaycan Avropa İttifaqının enerji təhlükəsizliyində yeganə alternativ ölkədir. Deməli, Avropa Parlamenti Avropa İttifaqının enerji təhlükəsizliyinə kökündən balta vurmağa və enerji böhranının daha da dərinləşməsinə çalışır. Təbii ki, bu məsələlər Avropa İttifaqı üçün yaxşı heç nə vəd etmir.
A.Badamov vurğulayıb ki, Avropa Parlamenti COP29 konfransını da siyasiləşdirməyə çalışır: "Bu konfrans dünyanın baş verə biləcək təbii fəlakətlərdən qorunması üçün qlobal həmrəyliyə nail olunmasına hesablanıb. COP29-u heç vaxt siyasi məsələlərlə eyniləşdirmək olmaz. Bu məsələ canlı aləmin gələcək mövcudluğu məsələsidir, amma avropalı parlamentariləri bu maraqlandırmır. Bu gün avropalı siyasətçilərin şəxsi həyatlarına baxsaq, görərik ki, əksəriyyəti cinsi azlıqların nümayəndələridirlər. Əgər avropalı siyasətçilər özlərinin gələcəyi ilə bağlı düşünmürlərsə, onlardan COP29-la bağlı da müsbət fikir gözləmək lazım deyil".
Avropanın böyük problemlərin içərisində olduğunu qeyd edən A.Badamov deyib ki, AP-nin öz daxili problemləri ilə məşğul olması və müstəqil siyasət yürüdərək dünyada körpülər yaratmağa çalışan Azərbaycanın işinə qarışmaması yaxşı olardı. Avropa Parlamenti, onun sifarişçiləri olan Fransa və digərləri Azərbaycanla siyasi təzyiq dilində danışa və bizi ədalətli mövqeyimizdən heç vaxt çəkindirə bilməzlər.
Əsmər QARDAŞXANOVA,
"Azərbaycan"
