Çin-Azərbaycan dostluğu dərin və qədim köklərə malikdir. Min ildən artıq bir müddət əvvəl qədim İpək Yolu xalqlarımızı bir-birinə bağlayırdı. İki ölkə arasında diplomatik münasibətlərin qurulmasında 33 il ərzində dövlət başçılarımızın strateji rəhbərliyi və birgə səyləri ilə Çin-Azərbaycan münasibətləri daim inkişaf edir və bərabərhüquqlu, qarşılıqlı faydalı əməkdaşlığın nümunəsinə çevrilib.
AZƏRTAC xəbər verir ki, bu barədə Çinin Azərbaycandakı səfiri Lu Mey mayın 21-də Bakı Dövlət Universitetində XXIV “Çin dili körpüsü” beynəlxalq müsabiqəsinin Azərbaycan final mərhələsində çıxışında deyib.
“Çinin Azərbaycandakı səfiri kimi vəzifəyə başladıqdan sonra ilk tədbirimdə - “Çin dili körpüsü” Çin dili müsabiqəsində iştirak edirəm. İlk növbədə, XXIV “Çin dili körpüsü” beynəlxalq müsabiqəsinin Azərbaycan final mərhələsinin təşkilatçılığında əməyi keçən hər kəsə təşəkkür edirəm.
Həmçinin uzun illərdir ki, Çin dili tədrisini dəstəkləyən, Çin-Azərbaycan dostluğuna töhfə verən hər kəsə dərin hörmətimi bildirirəm.
Azərbaycan Respublikasının Prezidenti İlham Əliyev Çinə dövlət səfəri etdi və dövlət başçılarımız Çin-Azərbaycan arasında hərtərəfli strateji əməkdaşlıq münasibətlərinin qurulduğunu birgə bəyan etdilər. Bu, iki ölkə arasında praktik əməkdaşlığın dərinləşməsi və mədəni-humanitar mübadilələrin genişlənməsi üçün yeni imkanlar açır.
Dövlətlərarası münasibətlərin əsasını xalqların dostluğu təşkil edir. Çin-Azərbaycan münasibətlərinin davamlı inkişafı hər iki ölkənin gənclərinin fəal iştirakı və dəstəyi olmadan mümkün deyildi. Bu gün daha çox Azərbaycan gənci Çin dilini öyrənir, Çin mədəniyyətini tanıyır və Çinə dərin maraq göstərir. Bu fürsətdən istifadə edərək azərbaycanlı dostlara arzum budur ki, bu imkanlardan maksimum istifadə edərək Çin dili biliklərini daim təkmilləşdirsinlər və hər birimiz öz sahəmizdə Çin-Azərbaycan hərtərəfli strateji tərəfdaşlığın möhkəmlənməsinə töhfə verək”, - deyə səfir Lu Mey əlavə edib.
jpg_1749076194.jpg)
