"Laçın" sərhəd-keçid məntəqəsi ilə ərazi bütövlüyümüzün sarsılmaz əsası qoyuldu

"2023-cü il aprelin 23-də Laçında sərhəd-keçid məntəqəsinin qurulması Vətən müharibəsindəki qələbə qədər böyük əhəmiyyətə malik hadisədir. Bu, Azərbaycanın dövlət təhlükəsizliyinin təmin olunması istiqamətində atılmış zəruri addım idi". 
Bu fikirləri "Azərbaycan" qəzetinə Milli Məclisin deputatı Elşad Mirbəşiroğlu deyib. Deputat bildirib ki, Azərbaycanın 2020-ci ildən sonra Ermənistan tərəfinə reinteqrasiya, separatçıların silahı yerə qoyması, erməni silahlı qüvvələrinin qalıqlarının ərazilərimizdən çıxarılması ilə bağlı çağırışlar etməsinə baxmayaraq,  Ermənistan havadarlarının təlimatları əsasında bu çağırışlara düzgün reaksiya vermədi. Laçın yolundan istifadə edərək separatçıları yenə silah-sursatla təmin edib, bu yol vasitəsilə bütövlükdə separatizmin ayaqda qalmasına hər cür dəstək göstərildi. Belə olan halda separatizm təhlükəsini aradan qaldırmaq lazım idi. İlkin mərhələdə onların ayaqda qalmasını təmin edən addımların qarşısı alınmalıydı, çünki Ermənistan tərəfindən bu hallar getdikcə intensivləşirdi. Azərbaycan ərazisində 2021-ci ildə istehsal olunmuş minalar da aşkarlanırdı. Deməli, Ermənistan Laçın yolundan istifadə edərək xalqımıza qarşı mina terrorunu davam etdirirdi. Bu baxımdan Laçın yolunda nəzarət-buraxılış məntəqəsinin qurulması təhlükəsizliyimizin təmin edilməsi istiqamətində ən vacib addımlardan biri oldu. 
Deputat vurğulayıb ki, sərhəd-keçid məntəqəsinin qurulması ilə bütün ərazilərimiz boyunca suverenliyimizin etibarlı və dönməz şəkildə təmin olunmasının sarsılmaz əsası qoyuldu: "Laçın yolu üzərindən də ölkəmizə qarşı siyasi hücumlar başladı. Azərbaycan bütün dünya dövlətləri kimi, öz ərazisində suveren nəzarət hüququnu təmin etdi, buna baxmayaraq müxtəlif Avropa platformalarında Azərbaycan guya erməniləri blokadaya alıb, ermənilərə qarşı hansısa aksiya həyata keçirir deyə əsassız iddialar səsləndirilirdi. Bütün bunlar marginal qrupların ölkəmizə qarşı saxta əsaslarla siyasi hücumları idi. Məqsəd Azərbaycan ərazisindəki ermənilərin hüquqları və təhlükəsizliyi üzərindən Cənubi Qafqazda yenidən gərginlik elementlərinin yaradılması və  regiona müdaxilə imkanı qazanmaları idi. Təsadüfi deyil ki, başda Şarl Mişel olmaqla avropalı siyasətçilər Azərbaycan ərazilərində qalmış ermənilərin hüquq və təhlükəsizliyi məsələsinin beynəlxalq mexanizmlərin tətbiqi yolu ilə həllini tapmalı olduğunu tez-tez səsləndirirdilər. Azərbaycan tərəfi isə buna görə kənar subyektlərin narahat olmamasını bildirir, bunu daxili işimiz kimi bəyan edirdi". 
E.Mirbəşiroğlu vurğulayıb ki, Azərbaycan Laçın yolunda nəzarət-buraxılış məntəqəsini qurmaqla bir neçə istiqamətdə çox mühüm nəticələrə hesablanmış addımlar atıb. Birincisi, ərazimizdə separatizmin dəstəklənməsi imkanları aradan qaldırıldı, müvafiq olaraq dövlət təhlükəsizliyimizə olan təhdid aradan qalxdı. Digər tərəfdən, Cənubi Qafqazda ermənilər üzərindən geosiyasi ambisiyaların həyata keçirilməsinin qarşısını almaqla regional təhlükəsizliyə çox böyük töhvə vermiş olduq. Azərbaycanın çox haqlı olaraq nəzarət-buraxılış məntəqəsini qurması sonrakı proseslərin çox təsirli drayveri rolunda çıxış etdi. Qısa müddət sonra bütün ərazilərimiz boyunca suverenliyimiz təmin edildi. Həm də dünyaya göstərdik ki, Azərbaycan dövləti, xalqı öz ərazilərinin sahibidir. Heç bir halda öz ərazilərində kənar nəzarətə, fəaliyyətə imkan verməyəcək.

Əsmər QARDAŞXANOVA,
"Azərbaycan"