Qazaxıstan üçün İran Yaxın Şərqdə yaxın qonşu və etibarlı tərəfdaşdır. Biz İran xalqına çox böyük hörmətlə yanaşırıq. Bütün çətinliklərə baxmayaraq, əlaqələrimizi inkişaf etdirməyə davam edirik.
AZƏRTAC Akorda mətbuat xidmətinə istinadən xəbər verir ki, bu barədə Qazaxıstan Prezidenti Kasım-Jomart Tokayev Orta Asiya ölkəsinə rəsmi səfərə gələn İran Prezidenti Məsud Pezeşkianla görüşündə bildirib.
“Ölkələrimiz arasında münasibətlər dərin köklərə malikdir. Bizim oxşar adət-ənənələrimiz, mədəniyyətimiz var. Biz əsrlər boyu qarşılıqlı fəaliyyət göstəririk. Qazaxıstan həmişə İranı dəstəkləyir, bizim aramızda heç bir problem və ya həll edilməmiş məsələlər yoxdur. Hesab edirəm ki, ölkələrimizin qarşılıqlı fəaliyyət sahəsində böyük potensialı var. Astana ilə Tehran arasında, o cümlədən hökumət səviyyəsində konstruktiv siyasi dialoq qurulub. İkitərəfli sazişlər icra olunur, parlamentlərarası əlaqələr möhkəmləndirilir. İqtisadi-ticari əməkdaşlıq genişləndirilir. Bu ilin 10 ayı ərzində göstəricilərdə 2024-cü illə müqayisədə 40 faiz artım qeydə alınıb ki, bu da şübhəsiz, yaxşı nəticədir. Biz müəyyən edilmiş tempi saxlamalıyıq və qarşılıqlı ticarətin həcmini artırmalıyıq”, - deyə Qazaxıstan Prezidenti bildirib.
İran Prezidenti zəngin tarixə və mədəniyyətə malik qardaş və dost Qazaxıstana səfər etməkdən məmnun olduğunu qeyd edib.
“Bizim münasibətlərimiz geniş istiqamətlər üzrə durmadan inkişaf edir. Ölkələrimizin hökumətləri arasında səmərəli qarşılıqlı əlaqələr qurulub. Əminəm ki, siyasi, iqtisadi, mədəni, humanitar sahələrdə, eləcə də təhlükəsizliyin təmin edilməsi məsələsində əməkdaşlığın gücləndirilməsi üçün nəhəng potensialımız var”, - deyə İran lideri vurğulayıb.
