Qara dənizə mazut axıdılması nəticəsində delfinlərin kütləvi şəkildə ölməsi ilə bağlı vəziyyət getdikcə daha həyəcanlı hal alır.
AZƏRTAC xəbər verir ki, tələf olan delfinlərin sayı artıq 84-ə çatıb. Mütəxəssislər qeyd edirlər ki, ekosistem üçün fəsadlar uzunmüddətli ola bilər.
2024-cü il dekabrın 15-də Qara dənizdə baş verən mazut sızması bölgədəki delfin populyasiyasına fəlakətli təsir göstərib. “Delfa” Elmi-Ekoloji Delfin Xilasetmə Mərkəzinin məlumatına görə, Anapa, Novorossiysk, Gelencik, Tuapse vilayəti və Soçi sahillərində 84 ölü delfin tapılıb.
Mütəxəssislər vurğulayırlar ki, ilin bu vaxtı üçün bu qədər çox sayda ölü delfinin olması anormal dərəcədə yüksəkdir. Cəsədlərin vəziyyəti göstərir ki, delfinlərin əksəriyyəti fəlakətdən sonrakı ilk on gün ərzində ölüb.
Ekoloqlar xəbərdarlıq edirlər ki, mazutun tərkibindəki zəhərli maddələr dəniz ekosistemlərinə təsirini davam etdirdiyindən delfin ölümlərinin sayı yaxın aylarda arta bilər. Bundan əlavə, Kerç boğazı ərazisində balıq miqrasiyası ilə əlaqəli olan delfinlərin konsentrasiyası var. Bu, daha çox narahatlıq doğurur, çünki çirklənmə sahəsi genişlənərək dəniz məməliləri üçün riski artırır.
Hazırda mazut dağılmasının nəticələrinin aradan qaldırılması üzrə işlər davam etdirilir, lakin Qara dəniz ekosisteminin tam bərpası uzun müddət çəkə bilər.
Kerç boğazında “Volqoneft-212” və “Volqoneft-239” tankerlərinin batmasından sonra mazut dağılması Krımın və Krasnodar diyarının sahilyanı ərazilərinin irimiqyaslı çirklənməsinə səbəb olub. Rusiya Təbii Sərvətlər Nazirliyinin məlumatına görə, dənizə 4 min tona yaxın mazut axıdılıb və sahildə yeni çirklənmə qeydə alınmaqda davam edir. Mütəxəssislər xəbərdarlıq edirlər ki, delfinlərin bədənlərində toplanan toksikantlar onların immunitetini zəiflədə və müxtəlif xəstəliklərə səbəb ola bilər ki, bu da gələcək üçün məyusluq doğurur.
jpg_1769156458.jpg)
