Sərbəst güləş və daşqaldırma üzrə idman ustası Yaşar Cavadovu nəinki Salyanda, qonşu Neftçala, Biləsuvar, Sabirabad rayonlarında, habelə Şirvan şəhərində yaxşı tanıyırlar. Canı-qanı ilə idmana bağlı bir adam idi. Hamı ona "pəhləvan" deyə müraciət edirdi. 
Bayramlarda, el şənliklərində ağır daşları sinəsi üstə atar, dişi ilə qaldırar, bir neçə mismarı əli ilə müxtəlif şəklə salar, onları ovcu ilə taxtalara vurar, yumruğu ilə mişar daşlarını sındırar, dişi ilə maşınları yerindən tərpədib çəkərdi. Onun hər çıxışı tamaşaçılar tərəfindən alqışlarla qarşılanardı. Yaşar həm də poeziya həvəskarı idi. Xoşuna gələn şeirləri əzbərləyib tədbirlərdə şövqlə səsləndirərdi. 
Yaşar üç oğlunu - Vüsal, Vüqar, Turalı sonsuz məhəbbətlə istəyirdi. Çalışırdı ki, övladları da sağlam ruhda böyüyüb idmançı olsunlar. Bunun üçün uşaq yaşlarından onlarla məşqlər edirdi. 
Günlər keçir, övladları böyüyüb doğulduqları kənddəki məktəbi bitirirlər. Hər üçü də bir-birinin ardınca Azərbaycan Dövlət Bədən Tərbiyəsi və İdman Akademiyasına daxil olur. Atalarının yolunu davam etdirən hər üç qardaş təhsil aldıqları illər ərzində idmanın sirlərinə, fəndlərinə bələd olmaqla bərabər, fiziki cəhətdən qüvvətli olmağı da bir an belə unutmurlar. 
İdman ustası Vüsal Cavadov hazırda ədliyyə orqanlarında çalışır. Vüqar və Tural Cavadovlar isə Salyan Uşaq-Gənclər İdman və Şahmat Məktəbində işləyirlər. Sərbəst güləş üzrə idman ustası Tural məşqçi, idman ustalığına namizəd Vüqar isə məşqçi köməkçisidir. Onlar idmanın kütləviliyini artırmaq, doğulduqları dədə-baba yurdlarındakı - Salyan rayonunun Şorsulu kəndindəki yeniyetmə və gəncləri idmana cəlb etmək, onların asudə vaxtlarını mənalı, səmərəli etmək məqsədilə öz vəsaitləri ilə sərbəst güləş və daşqaldırma idman növləri üzrə "Yaşar idman klubu"nu təsis ediblər. Klub dövlət dəstəyi ilə lazımi idman avadanlıqları ilə təchiz edilmişdir. Hazırda Şorsulu və ətraf kəndlərdən olan 50 yeniyetmə və gənc buraya gələrək asudə vaxtlarını səmərəli keçirir, idmanın sirlərini öyrənirlər. 

Fərid İBRAHİMOV, 
Salyan rayonunun Şorsulu kənd sakini