Ötən beş ildə DOST mərkəzlərində 2,2 milyon vətəndaşa xidmət göstərilib. Vətəndaşların həmin xidmətlərdən məmnunluq səviyyəsi 98,2 faiz təşkil edib.

AZƏRTAC xəbər verir ki, bunu ilk DOST mərkəzinin açılışının 5 illiyi ilə əlaqədar keçirilən mətbuat konfransında DOST Agentliyinin İdarə Heyətinin sədri Fərid Məmmədov bildirib.

F.Məmmədov Prezident İlham Əliyev və birinci xanım Mehriban Əliyevanın iştirakı ilə 2019-cu il mayın 9-da DOST Agentliyi və ilk DOST Mərkəzinin açılışı olduğunu xatırladıb. Birinci vitse-prezident Mehriban xanım Əliyevanın təşəbbüsü olan DOST konsepsiyası 15 istiqamət üzrə 159 sosial xidmətin “bir pəncərə”dən, şəffaf və operativ, vətəndaş məmnunluğu prinsipi əsasında təqdim olunmasına imkan yaradıb.

Qeyd olunub ki, ötən dövrdə DOST infrastrukturunun genişləndirilməsi işləri aparılıb. Artıq Bakı şəhəri, Abşeron və Bərdə rayonlarında olmaqla 7 DOST mərkəzi açılıb. Eyni zamanda, işğaldan azad edilmiş bölgələrimizdə DOST xidmətlərinin qurulması istiqamətində ilk addım kimi 2022-ci ilin mayında Zəngilanın Ağalı kəndində ilk “Smart DOST” xidmət məntəqəsi də istifadəyə verilib. Ümumilikdə 17 yeni Regional DOST Mərkəzinin və həmin mərkəzlərlə yanaşı, ətraf rayonlar üzrə onların 55 filialının da yaradılması, bütün ölkənin DOST xidmətləri ilə əhatə olunması nəzərdə tutulub. Hazırda Naxçıvan, Şuşa, Quba, Sabirabad, Sumqayıt, Gəncə və Masallıda DOST xidmətləri infrastrukturunun qurulması üçün layihə, təmir-tikinti işləri aparılır.

DOST konsepsiyası beynəlxalq səviyyədə də yüksək qiymətləndirilir və ötən dövrdə 30-dan çox beynəlxalq mükafat və sertifikatla təltif olunub. Həmin mükafatların sırasında Avropa Sosial Şəbəkəsinin, Beynəlxalq Sosial Təminat Assosiasiyasının, Beynəlxalq Pensiya və Sosial Fondlar Assosiasiyasının və sair xüsusi mükafatları yer alır.

Həmçinin DOST Agentliyi dünyada məşhur olan LRQA sertifikatlaşdırma (Böyük Britaniya) təşkilatı tərəfindən 4 istiqamət üzrə beynəlxalq ISO sertifikatlarına layiq görülüb. Hazırda bir çox ölkələr DOST təcrübəsini öyrənərək onu tətbiq etməyə maraq göstərirlər və bu sahədə həmin ölkələrlə təcrübə mübadiləsi aparılır.

“Könüllü DOST” proqramından da bəhs olunub. Ölkəmizdə könüllülük hərəkatının genişlənməsində mühüm rola malik olan həmin proqrama ötən dövrdə 112,5 mindən çox müraciətin olduğu, 4,8 mindən çox şəxsin “Könüllü DOST” proqramına cəlb edildiyi bildirilib.

Tədbirdə, həmçinin DOST Agentliyinin 5 illik fəaliyyəti ilə bağlı hesabat xarakterli videoçarx nümayiş olunub, media nümayəndələrinin sualları cavablandırılıb.