Yanvarın 29-da keçiriləcək bələdiyyə seçkilərinə hazırlıq işləri Neftçala rayonunda tam başa çatıb. Bu barədə 70 saylı Neftçala dairə seçki komissiyasının sədri Ülvi Nəhmədzadə məlumat verib. O deyib ki, dairənin əhatə etdiyi ərazidə 48 seçki məntəqəsi var. Həmin məntəqələrdəki seçicilərin sayı 51 min 478 nəfərdir.
Seçkilərə hazırlığın ilkin mərhələsində MSK-nın tərtib etdiyi Təqvim Planına əsasən, seçicilərin siyahısı dəqiqləşdirilərək məntəqələrdəki xüsusi lövhələrdən asılmışdır. Bu siyahılar həm də hər bir seçicinin hansı məntəqədə səs verməsini bildirir: "Çalışmışıq, Təqvim Planında nəzərdə tutulan bütün tədbirləri vaxtında yerinə yetirək. Deyə bilərəm ki, seçkilərin şəffaf, demokratik keçməsinə nail olacağıq.
5 məntəqədə veb-kamera quraşdırılıb. Seçkilərin gedişini izləmək üçün 600 nəfərdən çox müşahidəçi qeydə alınıb", - deyə DSK sədri bildirdi.
Dairə üzrə 7 bələdiyyəyə 169 namizəd qeydə alınıb. Onların 81 nəfəri YAP, 1 nəfəri Vətəndaş Həmrəyliyi, 1 nəfəri də Ümid partiyaları tərəfindən irəli sürülüb. Qalan 86 nəfər isə öz təşəbbüsləri ilə seçkiyə qatılıb.
Dairə sədrinin sözlərinə görə, seçki günü 2 seçicinin 18 yaşı tamam olacaq. 2 nəfər seçicinin isə yaşı 100-dən yuxarıdır. Onlar Həsənabad qəsəbə sakini İbrahim Əhmədov və Şirvanlı kənd sakini Sura Axundovadır. Seçkilərin qanunauyğun, yəni müvafiq təlimatlara əsaslanmaqla keçirilməsini təmin etmək üçün məntəqə üzvləri üçün treninqlər keçirildiyini deyən Ü.Nəhmədzadə artıq seçki bülletenlərinin MSK-dan gətirildiyini qeyd etdi.
3 saylı seçki məntəqəsi Neftçala şəhərindəki Mədəniyyət və İncəsənət Mərkəzində yerləşir. Məntəqə seçki komissiyasının sədri Cahangir Abdullayev bizi məntəqə üzvləri ilə tanış etdi. Hamısı gənclərdir. Öhdələrinə düşən işi səylə yerinə yetirirlər. İstəyirlər ki, seçkilər yüksək vətəndaş fəallığı şəraitində keçsin. Bunun üçün hər bir küçəyə, dalana, evə, mənzilə baş çəkir, bildirişləri çatdırırlar. Onların fəallığı nəticəsində bu iş vaxtında yekunlaşmışdır.
Söhbət zamanı C.Abdullayev bildirdi ki, məntəqə üzrə 1461 nəfər seçici qeydə alınıb. İlk dəfə səsverənlər 10 nəfər olacaq. Xəstə seçicilərə gəldikdə isə onlar 19 nəfərdir. Seçki günü məntəqə üzvlərindən bir nəfər müşahidəçi ilə birlikdə onların evlərində səs vermələrini təmin edəcəklər. Məntəqədə veb-kamera quraşdırılmış, müşahidəçilər və media nümayəndələri üçün xüsusi yerlər ayrılmışdır.
Seyran CAVADOV,
"Azərbaycan"
