Öskürək orqanizmin müdafiə mexanizmidir. Xəstəlik zamanı öskürək nəfəs yollarında yığılan artıq seliyi və ziyanlı maddələri xaric etməyə kömək edir. Lakin bəzən öskürək çox uzunmüddətli olur. 8 həftədən artıq davam edən öskürəyə tibdə "xroniki öskürək" deyilir.
AZƏRTAC xəbər verir ki, bunu Nərimanov Tibb Mərkəzinin Poliklinika şöbəsinin müdiri Nailə Bağırova deyib. Onun sözlərinə görə, xroniki öskürək xəstəlik deyil, orqanizmdə yaranan müxtəlif problemlərin simptomudur.
Həkim xroniki öskürəyin yaranma səbəblərini sadalayıb: “Siqaret çəkən insanların əksəriyyəti xroniki öskürəkdən əziyyət çəkir. Tüstü bronxların daralmasına və xroniki iltihabına səbəb olur. Tütün məhsullarından istifadə edən şəxslərin çoxunda xroniki bronxit aşkar olunur. Siqaret tüstüsünün mənfi təsiri ilə bağlı yaranan digər bir problem isə bronxların xroniki obstruktiv xəstəliyidir. Bu xəstəlik zamanı bronxlarda daralma müşahidə edilir. Nəticədə xəstədə xroniki öskürək, təngnəfəslik, havasızlıq hissi yaranır. Bəzən xəstələr bu simptomları ürək xəstəlikləri ilə əlaqələndirirlər.
Astma xəstəliyi xroniki öskürəyin yaranmasının əsas səbəblərindən biridir. Bu zaman xəstənin bronxlarında daralma və iltihab qeydə alınır. Xroniki öskürək, xırıltılı nəfəsalma, boğulma tutmaları ilə müşahidə olunur.
Reflyüks xroniki öskürəyin səbəbi ola bilər. Bu xəstəlik zamanı mədə şirəsinin bir hissəsi qida borusuna və qırtlağa düşür. Nəticədə nəfəs yollarının spazmı əmələ gəlir ki, bunun nəticəsində insan dayanmadan öskürür.
Burun ciblərinin iltihabı, bəzi dərman preparatlarının qəbulu, ağciyərdə yaranan problemlər də xroniki öskürəyin yaranma səbəbidir. Uzunmüddətli xroniki öskürək orqanizm üçün təhlükəli ola bilər. Bu kimi hallarda mütəxəssisə müraciət etmək və vaxtında müalicə vacibdir”.
