İraqdakı ümumi seçkilərin qeyri-rəsmi nəticələrinə görə, Baş nazir Məhəmməd Şiə əl-Sudaninin rəhbərlik etdiyi "Yenidənqurma və İnkişaf" koalisiyası ən çox səs toplayaraq birinci yeri tutub. Noyabrın 11-də keçirilən seçkilərin nəticələri İraqın Müstəqil Ali Seçki Komissiyasının sədri, hakim Ömər Əhməd Məhəmməd və komissiya üzvləri tərəfindən keçirilən mətbuat konfransında açıqlanıb.
Paytaxt Bağdadda Baş nazir Sudaninin rəhbərlik etdiyi "Yenidənqurma və İnkişaf" koalisiyası birinci yeri tutub. Keçmiş parlament spikeri Məhəmməd Halbusinin Təqaddum Partiyası ikinci yerə, keçmiş baş nazir Nuri əl-Malikinin "Qanun Dövləti" koalisiyası isə üçüncü yerə sahiblənib. Şiə siyasi və dini lideri Əmmar Həkimin rəhbərlik etdiyi Milli Dövlət Qüvvələri Alyansı dördüncü, Əsaib Əhlilhəq hərəkatı ilə əlaqəli “Sadiqun” siyahısı isə beşinci yeri tutub.
Mosulda Məsud Bərzaninin rəhbərlik etdiyi Kürd Demokrat Partiyası (KDP) birinci, Halbusinin partiyası ikinci, Sudaninin koalisiyası isə üçüncü yerdədir.
Ərbildə də KDP birinci olub, Kürdüstan Kürdüstan Yurtsevərlər Birliyi (KYB) ikinci yeri, Duruş Hərəkatı üçüncü, Yeni Nəsil Hərəkatı isə dördüncü yeri tutub.
Bəsrədə qubernator Əsəd İdaninin Tasmim koalisiyası ən çox səs toplayaraq birinci yerə yiyələnib, “Sadiqun” siyahısı ikinci, Sudaninin koalisiyası üçüncü, Malikinin koalisiyası isə dördüncü olub.
Ənbarda Halbusinin partiyası birinci yeri tutub. Süleymaniyyədə KYB birinci, Duruş Hərəkatı ikinci, Yeni Nəsil Hərəkatı isə üçüncü yerə sahiblənib.
Duhokda KYB birinci, İslam Birliyi Partiyası (Yekgirtu) ikinci və Duruş Hərəkatı üçüncü yerdə qərarlaşıb.
Səlahəddində Halbusi birinci, Sudani ikinci, “Əzim” koalisiyası isə üçüncü yeri qazanıb.
Nəcəf və Kərbəla şəhərlərində Sudani qələbə qazanıb, Vasitdə isə onun liderliyindəki koalisiya üçüncü yerlə kifayətlənib. Musanna qubernatorluğunda Sudani yenə birinci olub, Malikinin koalisiyası isə ikinci yeri tutub.
Meysan və Zikar, Babil və Qadisiya əyalətlərində Baş nazir Sudaninin rəhbərlik etdiyi "Yenidənqurma və İnkişaf" koalisiyası liderliyi ələ keçirib.
Kərkük şəhərində KYB birinci, Halbusinin Təqaddum Partiyası ikinci, "İraq Türkmənlərinin Birləşmiş Cəbhəsi" siyahısı üçüncü, KDP isə dördüncü yeri tutub. Orada Ərəb alyansı beşinci, “Əzim” koalisiyası isə altıncı olub.
Diyalada şiə milis lideri Hadi Əmiri və onun "Bədir" hərəkatı birinci, Halbusinin partiyası ikinci, Xamis Xənçərin rəhbərlik etdiyi “Siyadə” Alyansı isə üçüncü yeri tutub.
Baş nazir Sudani koalisiyasının qələbəsini elan edərək deyib:
"Yenidənqurma və İnkişaf" alyansı birinci yeri tutdu, çünki o, "İraq birinci" prinsipinə inanır. İraq övladlarının fədakarlığı sayəsində ölkəmiz həmişə prioritetimiz olaraq qalacaq. İş, quruculuq və uğur yolumuzu dəstəklədiyinə görə xalqımıza təşəkkür edirik”.
Sudani tərəfdarları Bağdad küçələrində yürüş edərək Baş nazirin seçki qələbəsini qeyd ediblər.
Rizvan CƏFƏROV,
“Azərbaycan”
